Årsaka er at svenske styresmakter har trekt seg ut av samarbeidsprosjektet om unike vikingstader i Nord-Europa. Seniorrådgjevar hos Riksantikvaren, Lisen Roll, er skuffa over svenskane.
– Vi er skuffa over dette, vi kan ikkje seie noko anna, seier ho.
Steinbrota har truleg eksistert frå forhistorisk tid.
Kan stikke kjeppar i hjulet
For prosjektleiaren hos riksantikvaren kom det brått på at svenskane meinte at vikingbyen Birka ikkje skulle vere med vidare. Dette kan stikke kjeppar i jula for kvernsteinsparken i Hyllestad sin draum om verdsarvstatus.
– Svenskane seier dei har ei litt anna haldning til vikingtida enn vi i Norge, Dei meiner at nominasjonsdokumentet var prega av nasjonalromantiske haldningar og at det mangla perspektiv på samfunnsklassar, kvinner og born, seier Roll.
I Hyllestad har ein funne spor etter produksjon og eksport av Kvernstein heilt tilbake til 700-talet. Sidan 2010 har ein jobba i herdig for at kvernsteinsparken skal inn på Unesco-lista saman med ei rekkje andre Viking-stader i Nord-Europa. At svenskane trekk seg ut, fører til minst eitt års utsetjing før Hyllestad kan smykke seg som verdsarvområde.
OPTIMIST: Astrid Waage i kvernsteinparken håper på lykkeleg utgant på det heile.
Foto: Tone Merete Lillesvangstu / NRK
– Det betyr at vi får ein heil del meirarbeid med å skrive om sjølve søknaden, seier leiar for Norsk kvernsteinssenter, Astrid Waage.
Er ikkje uroa
Ho vonar sterkt at svenskane si utmelding av prosjektet ikkje vil gjere det vanskelegare for verdsarvtanken i Hyllestad.
– Vi er litt utolmodige, men eg er ikkje uroa. Eg håper det blir ein lykkeleg utgang på det. Vi får ta den tida som trengst for å gjere eit skikkeleg forarbeid både på lokalt og sentralt hald.
