Norsk krim slår an i Storbritannia

På eit ærverdig hotell på den engelske vestkysten samlast forfattarar, bransjefolk og ivrige lesarar til den årlege Crimefest. Og her, mellom verdskjende forfattarnamn, opplever nordiske forfattarar aukande interesse for det dei skriv.

Horst og Lahlum

– Det er eit fokus som er helt spesielt desse årene, seier Gunnar Staalesen begeistra.

Han peikar på at Jørn Lier Horst og Hans Olav Lahlum er nominert til pris for beste nordiske kriminalroman gitt ut på engelsk.

Staalesen får støtte frå Barry Forshaw. Han er litteraturkritikar og ein av Englands fremste krimekspertar.

Stadig større

– For 15 år sidan ville ein norsk agent hatt vanskar med å få til eit møte med ein engelsk forleggar. No står dørene opne.

Barry Forshaw har skreve bok om krimbølga frå Norden. Fenomenet har også fått sin eigen programpost på festivalen. Forshaw seier den nordiske bølga ikkje har nådd toppen ennå.

Annleis samfunnskritikk

Også Nils Nordberg, Noregs fremste krimekspert, er på festivalen i Bristol. Han trur engelske lesarane blir tiltrekt av samfunnskritikken i nordiske krimbøker.

– Det kan vere fordi det handlar om fungerande velferdsstatar der ting likevel ikkje er heilt som dei skal vere. Det skaper ei spesiell atmosfære for lesaren, trur Nordberg.

Forshaw er einig. Sjølv om det også finst bøker med samfunnskritikk i britisk litteratur, meiner han at dei nordiske forfattarane gir noko ekstra.

Karen Sullivan er Staalesen sin nye forleggar. Ho har store forventingar til den ferske boka, som er den sjette Veum-boka engelsk. Forleggaren beskriv bøkene til bergensforfattaren som eksotiske og annleis. Ho veit at mange ventar utolmodig på denne boka.

Noko av det største

– Eg har fått fleire epostar om denne boka enn om noko anna. Det er veldig spennande, fortel Sullivan.

Sjølv om det er eit stykke opp til Jo Nesbø, som toppar salslistene, har Staalesen og hans bergenske detektiv sine trufaste fans.

Staalesen sit ved eit bord og signerer bøker til fans. Han synest det er spennande å lukkast på det engelskspråklege marknaden.

– Når ein kjem frå eit så lite språkområde som Noreg og blir gitt ut i Storbritannia, så er jo det noko av det ein kan vere aller mest nøgd med som krimforfattar.