– Det er berre å bli hoppande glad for det. Det er artig at det går rett veg, seier seniorforskar Arild Landa ved Norsk institutt for naturforsking (NINA).
I vinter vart til saman 30 fjellrevar sett ut på Hardangervidda, på fire forskjellige stader. Med på turen var klima- og miljøminister Tine Sundtoft.
Trass i at fem av dei har vorte påkøyrd, er seniorforskaren optimistisk og har god tru på at ein igjen skal få ein levedyktig stamme med fjellrevar på Hardangervidda.
- LES OGSÅ:
Kjempar for å berge fjellreven
I mange år har forskarar både i Norge og Sverige kjempa for å berga den utryddingstruga fjellrevbestanden. I Norge har Direktoratet for naturforvaltning dei siste åra sett ut kvelpar som er avla fram på Oppdal.
Det har ein gjort mellom anna i Rana, på Saltfjellet og på Finse. 2012 var eit katastrofalt dårleg år for fjellreven i Norge, men sidan då har det gått rette vegen.
– So langt i år er det registrert 26 kull med minst 166 kvelpar, men vi trur det kan bli enno fleire, sa koordinator for overvakingsprogrammet, Nina Eide, til NRK tidlegare i juli.
Saka held fram under biletet
– Høyrer heime i høgfjellet
Han og dei andre ved NINA har søkt grunneigarane på Hardangervidda om å få sette ut tjue fjellrevkvelpar i året. Målet er å gjere nasjonalparken til det største fjellrevområdet i Norge.
– Tidlegare var det tusenvis av fjellrev i den norske fjellheimen. Den høyrer heime i høgfjellet, seier Landa.
Det var omfattande jakt som var ein av årsakene til at fjellreven vart utryddingstruga. Frå 1879 til 1911 var det truleg skote meir enn 2000 fjellrev kvart år. I tillegg vart tamreven blanda inn med fjellrevane.
– Dei er ganske så forskjellige frå dei opphavlege norske fjellrevane. Så det er veldig bra at me har fått til me ynskjer. Me får berre kryssa fingrane for at held fram slik framover også, avsluttar Landa.