Kvinna vart arrestert i Førde i 23-tida tysdag kveld. Bergen lufthamn Flesland vart i går kveld evakuert i fleire timar etter at 18-åringen la fram ein bombetrussel mot eit Widerøe-fly.
Trusselen skal ha kome inn til flyselskapet via i eit chatte-program som Widerøe brukar til kundebehandling. Kvinna erkjente at ho stod bak då ho vart arrestert i går. Politiet har funne spor på telefonen hennar som bekreftar tilståinga.
– Men ho erkjenner ikkje straffskuld, seier forsvarar Odd Bovim til NRK.
Ber om undersøking
18-åringen blir framstilt for fengsling i Sunnfjord tingrett i Førde klokka 12.00 torsdag.
– Ho har det veldig tungt og synest situasjonen er vanskeleg. Samstundes samarbeider ho med politiet, legg Bovim til.
Han har bedt om ei personundersøking for å vurdere om kvinna oppfyller vilkåra for å bli straffa. Ifølge han har ho også bedt om dette.
– Har ho forklara kvifor ho kom med trusselen?
– Det ho har sagt er at ho ikkje hadde noko spesiell grunn til å gjere det, svarar Bovim.
Har kome med trugslar før
Widerøe har den siste tida fått fleire liknande meldingar frå kvinna.
– Ho blir etterforska opp mot denne trusselen, samt andre forhold ho er meldt for, sa Morten Ørn, sjef ved Bergen sør politistasjon til NRK tidlegare i dag.
Ifølge avisa Firda skal kvinna tidlegare ha kome med trugslar også mot lensmannskontoret i Førde.
Det er ikkje kjent kor lenge politiet vil fengsle kvinna.
