Tropenatt fire stadar i landet

Fire stader på Vestlandet var temperaturen ikkje under 20 grader mellom klokka 20 og 08. Stadene kan dermed skryte av tropenetter på tampen av ein elles regnfull sommar.

Den milde augustnatta prega heile Vestlandet, og fleire kjempa om å få tropenetter.

– Heilt fram til morgonkvisten var fleire stader med i kampen om tropenatt, fortel statsmeteorolog Julie Solsvik Vågane.

Til slutt var det Tafjord og Åndalsnes i Møre og Romsdal, Lærdal i Vestland og Fister i Rogaland som hadde temperaturar over 20 grader heilt over «målstreken».

I 2021 blei det målt tropenatt seks netter ulike stadar i landet, året før blei det målt 12 tropenetter.

Dette var den tiande natta til no i 2022 med tropenatt i landet, men august er ingen uvanleg månad med slike målingar, fortel Hanne Heiberg, klimavakt ved Meteorologisk institutt.

Seinaste registrerte tropenatt var ved Kråkenes fyr, 24. september 1938.

Vindauget på vidt gap

I Lærdal var Margrete Oline Horge blant dei som kunne glede seg over ei varm natt. Då ho stod opp på natta for å sjekke viste gradestokken 21,5 grader.

– Skulle ikkje tru det var sant. Det gjekk greitt å sove. Eg kjende på varmen, men med vindauget på vidt gap gjekk det bra, fortel lærdølen.

Sambygdingen Roger Nedberge Hille fortel på Facebook-sida «Sogn og Fjordane i bilde» om 23,4 grader på veggen heime hos han.

Seinast i juli blei det målt tropenatt fleire stadar i Rogaland, same natt gjekk Bergen akkurat glipp av tropenatta.

Ikkje fleire tropenetter

Ein del stadar på Vestlandet kjem temperaturen til å ligge opp mot 20 grader dagen i dag.

Frå fredag vil temperaturen halde seg for det meste under 15 grader og det vil vare gjennom helga. Det gjeld og store delar av Møre og Romsdal og Trøndelag.

Nattetemperaturen vil halde seg under 10 grader fortel meteorologen og dermed er det ikkje fleire tropenetter i vente med det første.

– Det er nok over for denne gang, seier Vågane.

Varm helg i vente

I helga er det venta godt vêr i hovudstaden, sjølv om tropenatt er utelukka.

– På Austlandet er det venta sol og 20 grader gjennom helga, fortel meteorologen.

Første juli i år blei årets første tropenatt for hovudstaden.

I nord er det venta eit vêrskifte laurdag og søndag og Vågane oppmodar om å nyte godvêret medan ein kan.

– For Nord Noreg sin del er lurt å nyte fredagen før ein går inn i ei gråare helg