Han er ein av to sjåførar på 74 år som framleis køyrer buss for Firda Billag i Naustdal i Sunnfjord kommune. Gjennomsnittsalderen i busselskapet er 59 år.
– Eg trivst med det. Eg har likt yrket heile vegen, seier Herstad til NRK.
Men dei neste åra får Firda Billag ei kjempeutfordring med å fylle tomme sjåførstillingar.
– Hadde vi ikkje hatt pensjonistane hadde vi hatt store utfordringar, fortel Frode Romarheim, dagleg leiar i Firda Billag Buss.
Alvorleg situasjon
– Vi har eit stort behov for fleire sjåførar, seier Romarheim.
Det er ikkje einaste busselskapet som treng fleire folk.
For halvanna år sidan fekk NHO Transport utarbeida tal som viser at Noreg treng 1.000 nye bussjåførar kvart år framover. Utfordringa er stor i byane, men størst i distrikta.
– Vi har ikkje tru på at tala har endra seg dramatisk. Gjennomsnittsalderen er framleis høg, seier administrerande direktør i NHO Transport, Jon H. Stordrange.
Tala viser at på landsbasis er to av tre sjåførar over 50 år. Stordrange meiner ein no må tenke nøye på rekruttering for å dekke behovet som kjem i åra framover.
Så langt har det beste tiltaket vore finansiering av utdanning. For halvanna år sidan fekk NHO Transport gjennomslag med regjeringa for å tilby lån til bussjåførutdanning gjennom Statens lånekasse for utdanning.
– Det har vore ein stor suksess, berre første året var det 600 personar som søkte om finansiering til å ta utdanning.
Stordrange seier hovudansvaret ligg på busselskapa.
– Vi kan legge til rette, men det er selskapa sjølv som må gjere rekrutteringa.
Skal løyse det
I år er Firda Billag 100 år. Romarheim legg planar for korleis dei skal bli nye 100 år. Ein av dei er tett samarbeid med Opplæringskontoret for transport- og terminalfag.
I tillegg skal dei bruke sosiale medium til å nå fleire arbeidssøkjarar. For Romarheim er det viktig at dei framsnakkar bussjåfør som eit yrke.
– Det er eit givande yrke, variert arbeidsdag. Der er mange positive element med å vere bussjåfør, seier han og meiner løna er betre enn mange skal ha det til.
I Naustdal nærmar det seg siste bussturen bak rattet for Roald Herstad. Til sommaren blir han 75 år, og då får han ikkje lov å køyre buss i rute.
– Då får eg begynne som dreng.
Det er ikkje snakk om å slappe av?
Jo, men eg må bevege meg litt. Eg kan ikkje berre legge meg på sofaen, smiler naustedølingen.