Har aldri hatt det så travelt

– Det har vore ekstremt mange oppdrag denne veka. Det har vore veldig hektisk, seier dagleg leiar Arild Tistel ved Førde Bilberging til NRK.no.

• Her kan du lese oppdaterte vegmeldingar for heile fylket

Tidlegare år har dei hatt rundt 20 oppdrag for dagen. I år opplever dei det travlaste året på lang tid.

– Alle bilane er ute

– Alle bilane våre er ute nesten heile tida, så vi har det veldig travelt, seier Tistel.

Førde Bilberging dekkjer store delar av Sogn og Fjordane. Dei har oppdrag frå Byrkjelo til Fjærland og Naustdal og Fjaler.

Dei har fire bergingsbilar for vanlege personbilar og to større berginsbilar for vogntog og lastebilar.

• LES OGSÅ: Fjellovergang stengt
• LES OGSÅ: Politiet: – La gjerne bilen stå

(Artikkelen held fram under biletet)

– I går hadde vi ein god del utforkøyrignar, men i dag har det i grunn vore ganske roleg hittil. Men oppdraga kjem heilt sikkert utover dagen, seier Tistel.

Har berre sove ein time

Det er ikkje berre Førde Bilberging som har det travelt for tida. Hos Havn Auto i Eikefjord i Flora står oppdraga i kø.

– Det går i eitt. Eg har køyrd i heile natt. Eg begynte klokka to, og var heime for å sove i ein time før den neste telefonen ringte, seier dagleg leiar Ole Johni Havn.

• LES OGSÅ: Glatte vegar over heile fylket
• LES OGSÅ: Mot tidenes kaldaste november

Då NRK.no snakka med han var han ute på nok eit oppdrag. Ein brøytebil hadde køyrd av vegen.

– Det har vore skikkeleg gale dei siste dagane. Vi har to bilar som køyrer heile døgnet, seier Havn til NRK.no.

– Mange oppdrag i natt

Hos Jans Bilberging i Stryn har dei henta mange bilar dei siste dagane.

– Det er bra trøkk, for det er mange som køyrer av vegen på dette føret. Vi har langt større pågang no enn tidlegare. I natt har det vore mange oppdrag på Strynefjellet. Folk brukar ikkje kjetting og då går det gale, seier Jan Bernhoft til NRK.no.

Politiet oppmodar folk om å ta det roleg på vegane i fylket.

– Det er glatte vegar over heile fylket. Folk må ta det med ro og sette ned farta, seier operasjonsleiar Espen Gulliksen ved Sogn og Fjordane politidistrikt.

• LES OGSÅ: Kulderekord tre stader i fylket