I fleire veker har Dalland frykta å bli åleine etter fødselen. Ho skal bli mor for første gong og har termin 23. mai. På kontroll på Stord sjukehus er hjartelyden fin, jenta i magen ligg rett veg og er klar til å koma ut.
Fram til nyleg har ho og mannen vore redde for at han måtte reisa heim til Tysnes like etter fødselen på grunn av smittevernreglane.
– Frå å bli rådd til å ha babyen i beresjal på barselavdelinga, blei han utelaten heilt. Han har følt seg gløymt, og eg har grua meg til å bli sitjande åleine med alt det nye, seier ho.
Få sjukehus opnar opp for partnarar
Fødeavdelingane i heile landet har sendt partnarane heim rett etter fødsel under koronautbrotet.
Trass i at samfunnet no gradvis opnar opp igjen, er dei aller fleste barselavdelingane framleis berre opne for mor og barn.
Men på sjukehusa på Stord, i Levanger og Namsos, og på barselavdelingane i Nordfjord og Lærdal, let dei no fedrar og medmødrer bli med under heile opphaldet. I Stavanger er barselhotellet ope for partnar, men barselavdelinga er framleis stengt.
– For oss har det vore viktig og naturleg å letta på restriksjonane når resten av samfunnet opnar opp. Det er svært viktig for både mor og partnar å vera saman dei første dagane, seier jordmor og seksjonssjef på Stord sjukehus, Isabel Solvang Tofte.
Etter 56 fødslar med partnarforbod på barselavdelinga, bad ho sjølv Helse Fonna om å vurdera smittefaren på nytt.
Framleis er det smittevernsreglar som at partnar må vera heilt frisk for å kunna vera med på både fødsel og barsel. Partnar kan heller ikkje forlata sjukehuset og koma tilbake.
Komande foreldre er uroa
Jordmorforbundet blir kontakta av mange gravide, som er uroa for dei strenge smittevernreglane. Dei ber no sjukehusa om gjera grundige vurderingar.
– Resten av samfunnet opnar opp. Då er det naturleg at det blir gjort ei lokal vurdering om det er muleg å opna opp for at fedrar kan vera med både på fødsel og i barseltida, seier leiar i Jordmorforbundet, Hanne Charlotte Schjelderup.
Nokre sjukehus og helseføretak NRK har vore i kontakt med, seier dei vurderer å letta på barselreglane. Fleire har likevel ingen planar å endra rutinane.
– Har landa eit turbulent fly
Folkehelseinstituttet har ingen eigne råd for smittevern på fødeavdelingane, men mange støttar seg på besøksforbodet i helseinstitusjonane.
Dei seier at det snart kjem nye råd for besøk i helseinstitusjonane, men at dei må tilpassast lokale forhold.
For Rebekka Instøy Dalland og mannen kom avgjerda til Stord sjukehus i tide. Dei er letta, og er klare for å gå gjennom fødsel og barseltid saman.
– Det kjennest som me endeleg har landa eit fly med veldig mykje turbulens, seier ho.