– Det er første gong i mi tid i styret at vi har hatt applaus rundt styrebordet. Det var velfortent i dag, seier styreleiar Agnes Landstad.
Det er eit stort prosjekt som er på gang. Planen er to nybygg aust for sentralsjukehuset og ei omfattande modernisering av høgblokka. Planlegginga har vart i meir enn fem år og nybygget kjem til å koste 1,65 milliardar kroner.
Landstad seier det ikkje var overraskande at vedtaket gjekk gjennom.
– Det er gjort eit grundig arbeid i heile organisasjonen over mange år, både med å planleggje tenesteutviklinga og bygningane vi vil ha bruk for.
Bygging i ti år
Moderniseringa kjem til å prege sjukehuset i Førde dei neste 10 åra. Dette er det største prosjektet sidan sjukehuset blei bygd i 1979, og etter planen skal bygginga vere ferdig i 2027.
For Helse Førde er prosjektet naudsynt for at Førde sjukehus i framtida skal kunne gje folk i fylket spesialisthelsetenester med den same kvaliteten som elles i landet.
Administrerande direktør Arve Varden håpar at pasientane skal få eit så godt helsetilbod som mogleg under bygginga.
– Det vil nok i nokre samanhengar oppleva at vi er under bygging og endring, men vi har veldig fokus på at vi skal greie å fornye oss, samstundes som vi skal gi gode helsetenester. Det er eit viktig og sentralt moment i den prosessen vi går inn i no, seier han.
11.000 nye kvadratmeter
Byggeprosjektet gjev Førde sjukehus 11.000 nye kvadratmeter og det blir ei ombygging av om lag 40.000 kvadratmeter. Prosjektet blir finansiert av lånemidlar frå Helse- og omsorgsdepartementet og eigenfinansiering.
No skal styret i Helse Vest behandle saka i desember, og etter det kan arbeidet starte.
VEDTAK: Styret i Helse Førde har no gitt grønt lys til å starte bygginga av nye Førde sjukehus.
Foto: Raymond Lidal / NRK
