– Det er mange som er på utfart, så det er greitt å vere skodd for vinterføret i fjellet, seier Per Egil Haga, vakthavande meteorolog.
Meteorologisk institutt har sendt ut farevarsel for fjellovergangane i Sør-Noreg denne helga. Årsaka er at det kan kome snø søndag og måndag.
Mykje trafikk på vegane i haustferien
Mange skal avslutte eller starte haustferien denne helga, noko som fører til ekstra trafikk mellom aust og vest.
For dei som skal mellom aust og vest, er det greitt å vite at vinteren er på veg.
Det ser ut som at temperaturane vil falle såpass mykje, at dei byene som kjem utover søndag og måndag, kan kome som snø.
– Det kan gi vanskelege køyreforhold, seier Haga.
Vegtrafikksentralen: Står klare
Nedbøren vil kome som snø på om lag 1000–1200 meters høgde. Trafikkoperatør i Vegtrafikksentralen, Oliver Hattland Iversen, viser mellom anna til at Hardangervidda og Sognefjellet er særleg utsett.
– Vi anbefaler sjåførar om å vurdere vinterdekk, seier Iversen.
Han ber sjåførane òg om å følge med på vêrvarsel og vegmeldingar før dei køyrer over.
– Trur du folk flest er budde på at snøen kjem?
– Eg håper dei som skal over fjellovergangane no er obs på at det kan kome snø i midten av oktober.
Ifølge trafikkoperatøren er entreprenørane også klare for snøen som vil kome.
– Dei skal i alle fall følge med på farevarselet og stå klare når snøen kjem.
Farevarsel også for regn
I Vestland er det også sendt ut gult farevarsel for regn. Frå laurdag kveld til søndag føremiddag kan det enkelte stader kome opp i 70 millimeter nedbør.