Såg livsverket gå opp i flammar

Rett før klokka tre i natt vart 65 personar evakuerte då ein eksplosjonsarta brann starta i hotellet. Ingen vart skadde, men for Carl Melchior Riiber er det svært tungt å sjå utbrente rom i livsverket sitt.

– Det er vondt. Ord blir flosklar i dag, seier han.

• Sjå bileta frå brannen

Fekk ut gamle møbler

Carl Melchior Riiber bygde opp hotellet i 1973. Han bur rett ovanfor hotellet som no er ei einaste stor branntomt. Familien kom og vekte Riiber for å fortelja at hotellet deira stod i fullt fyr seint i natt. Ei mager trøyst er at dei fekk redda ut nokre antikvariske møbler.

– Her står det vi kunne få ut, mellom anna møbler som er 150 år gamle. Dei er uerstattelege og som vi har mange minner knytt til.

• LES OGSÅ: Måtte sjå hotellet sitt i full fyr
• LES OGSÅ: Ærverdig hotell - har brunne før

Utbrente rom

Alle dei 65 gjestene vart evakuerte, og ingen kom til skade då alarmen gjekk klokka halv tre i natt. Sonen til Carl Melchior, Carl André Riiber driv hotellet, og fekk sjølv gjestene ut i natt. No står han att med røyk- og vasskadar i alle etasjar, og utbrente rom.

– Det vart totalt utbrent i løpet av fem minutt. Det ser heilt for jævlig ut, men det er materielle ting. Det viktigaste er at både hotellgjestane og dei tilsette har det bra.

Skremmande syn for gjestane

For gjestene på hotellet vart det ei dramatisk natt i Vik. Lisbeth Hagen og Berit Frikk Meling hadde lagt seg etter ein tannlegekonferanse i Vik. Dei låg i annekset ved sidan av hovudhotellet, og vart møtt av eit skremmande syn.

– Vi vekka alle samen og sprang ut. Då såg vi flammehavet. Vi såg flammane spreie seg langs mønet og vi visste at vi hadde kollegaer som budde der. Det var heilt forferdeleg.

• LES OGSÅ: Brannsjefen såg brannen starte
• LES OGSÅ: Fryktar brannen kan vere påsett

To mødre med babyar

Edel May Hansen fortel at ein av hennar mannlege kollegaer byrja å sløkkja brannen før brannvesenet kom.

– Det låg ein brannslange og den prøvde han å slukke med. Vi knuste ruter for å sjå om det var folk der.

Norunn Gaarden var ansvarleg for tannlegekonferansen og sov i hovudhotellet. Ho fortel opplevinga var verst for to mødre med babyar.

– Det er klart at dei vart redde. Det var ei dramatisk opppleving, men vi vart tekne godt vare på

Trur brannen starta ute

Fleire av gjestane er visse på at brannen starta ute i nokre klede som hengde til tørk. Dermed kan brannen vere påsett, og politiet vurderer fortløpande bistand frå Kripos, men kan ikkje seie meir om brannårsaka. Hotelldirektør Riiber konstaterer at brannen starta utandørs.

– Brannen starta ute og har spreidd seg opp langs ein yttervegg og teke tak i taket.

I helga skal det vera Gamalostfestival i Vik. Riiber har fått den verst tenkelege starten på festivalen.

– Vi skulle ha det kjekt her ved hotellet i tre dagar, men no blir dette flytta over til andre stader. Eg trur det går mange månadar før hotellet er intakt.