Fryktar brannen kan vere påsett

Etter alt å dømme har brannen starta i nokre dressar som hang til tørk utanfor hotellet - anten ved eit uhell, eller så er brannen påsett.

NRK veit at politiet sterkt vurderer å hente inn hjelp frå Kripos for hjelp i etterforskinga.

• LES OGSÅ: Det brenn på Hopstock Hotel i Vik

Kjende røyklukt før dei la seg

Fleire gjester skal ha kjent røyklukt på hotellet, før dei gjekk og la seg natt til fredag.

- Dei siste la seg om lag klokka to. Dei meinte at dei kjende røyklukt, seier Torunn Lindland Gaarden til NRK.

Ho er ansvarleg for ein konferanse, der 60 tannlegar frå Hordaland denne veke har vore i Vik i Sogn.

Artikkelen held fram under biletet

Sat opp til to-tida

Tannlegane kom til hotellet onsdag, og skulle etter planen reise heim i dag.

Men opphaldet vart langt meir dramatisk enn nokon hadde trudd på førehand: Natt til fredag stod Hopstock Hotell & Motell på Vikøyri i brann - og dei 65 gjestene vart evakuerte ut og i tryggleik.

• LES OGSÅ: Ærverdig hotell - har brunne før

- Vi hadde hatt kurs og ein fin dag. Etter middagen sat vi nede og prata og kosa oss, seier Lindland Gaarden.

Såg ingenting i gangane

Dei siste kursdeltakarane var i seng ved to-tida natt til fredag. Fleire hevdar å ha kjent røyklukt i gangane. Ikkje lenge etterpå gjekk brannalarmen.

- Dei sjekka gangen og såg ut vindauga - men dei såg ingenting. Så gjekk dei og la seg, og mellom kvart over to og halv tre gjekk brannalarmen, seier Lindland Gaarden.

• LES OGSÅ: Måtte sjå hotellet sitt i full fyr

Brannvesen og ambulanse kom raskt på staden, og brannen var ved åtte-tida fredag morgon under full kontroll. Men hotellet er utan tak, og det er store vass- og røykskader - blant anna på den eine soveromsdelen, diskoteket og restauranten.