Ryk framleis fire dagar etter brann

Natt til onsdag måtte Sivilforsvaret og brannvesenet rykkje ut til den kommunale kompostplassen i Lærdal, etter at det var oppdage ein ny ulmebrann.

– Ja, dei måtte til igjen i natt, seier Ragnar Kvamme Tokvam.

Sundag var han med å sløkke brann på same staden. I dag er han altså på plass igjen med gyllevogn fylt med vatn, for framleis kan ein finne små ulmebrannar

– Ja, det gjere det. Det tar seg opp igjen, men det er ikkje noko fare dette. Men me får dynka det skikkeleg, så me får slutt på det.

Natt til sundag var han ein av mange som stilte med traktor og gyllevogn for å hjelpe til i kampen mot flammane. I alt 40 bygg er registrerte som totalskadde etter storbrannen. Av dei er 17 bustadhus og mange er no huslaus.

• LES OGSÅ: Største brannen på 45 år

– Då telefonen ringe klokka 23:15 så var det berre å hive seg i skoa og kome seg av garde.

– Korleis var det å vere med på det infernoet som mange beskriv det som?

• LES OGSÅ: NRK sin reporter: Lærdal sentrum ber preg av å vere ei krigssone
• LES OGSÅ: – Det så ut som et vulkanutbrudd
  

– Det var nærast uverkeleg på ein måte, men ein lyt berre kome seg i gang og få gjort det ein kan.

– Det var jo mange bønder med gyllevogner som stilte opp, korleis trur du det hadde gått om de ikkje var her?

– Nei, sei det. Alle som var her med vognene sine køyrde alvorleg store mengder vatn. Alle har gjort ein stor innsats for å få sløkt brannen.