Av dei vel 154.000 som i år har søkt høgare utdanning, har 2064 av dei valt å søka det heilt nye studiet «Toll, vareførsel og grensekontroll». Det syner fasiten frå årets søkartal i Samordna opptak.
– Me kjem ut av ingenting og går rett til topps, og det er fantastisk morosamt. Me var veldig spente på korleis søkartala kom til å bli, seier tolldirektør Øystein Børmer.
Tidlegare var tollutdanninga ei intern utdanning som ikkje førte til at ein fekk ei grad. Det nye, treårige studiet er det Universitetet i Stavanger (UiS) som tilbyr. I tillegg til marknadsføringa UiS og Tolletaten har gjort, trur Børmer det er fleire årsaker til at det er så populært.
– Me har gjennom pandemien blitt profilert som ein sentral aktør på grensa og me har hatt ein eigen TV-serie som har vist fram korleis det er å jobba som tollar.
Flest søkarar innan helsefag
I fjor gjorde talet på søkarar til høgare utdanning eitt hopp på 8,7 prosent. Også i år stig talet, men med meir moderate 2,2 prosent.
Framleis søker flest helse- og sosialfag. I underkant av 40.000 har søkt utdanning innan fagområdet. Vernepleie har i år vore eit populært val. 22,6 prosent fleire har søkt retninga.
– Det er ei veldig positiv overrasking. Eg trur mange i denne tida vi har vore i no har sett kvar viktig helsetenesta er i velferdssamfunnet, og ønsker å bidra, seier forskings- og høgare utdanningsminister Henrik Asheim (H) til NRK.
13.370 har søkt på dei 5145 plassane på sjukepleiestudium i Noreg. Det meiner Asheim Noreg kjem til å trenga framover.
– Derfor er det bra at det kvart år blir utdanna fleire sjukepleiarar enn året før og at det framleis er langt fleire søkarar enn det er plassar.
I år har 12.421 ei lærarutdanning på fyrsteplass på søknadslista. Det er ein nedgang på 4,3 prosent frå i fjor.
Asheim seier det er vanskeleg å vite kva som er årsaka, men at pandemien har spilt ei rolle.
– Eg trur mange unge har sett kor krevjande det er å vera lærar med digital undervisning, og tenkt at slik er det å vera lærar. Men det er det altså ikkje.
Fleire vil gå fagskule
I fjor søkte rekordmange seg rett frå vidaregåande til høgare utdanning. I år er det færre 18- og 19-åringar som har søkt. I staden er det ein auke blant dei eldre søkjarane. Over 4500 fleire over 30 har søkt høgare utdanning. Den eldste som har søkt, er 88 år gamal.
Mange fleire vil dessutan gå på fagskule. 12 806 har søkt plass, ein auke på 37,4 prosent sidan i fjor.
Noko av auken skuldast at talet på fagskulestudium i det samordna opptaket har økt frå 318 til 494. Utan dei nye studia er det likevel 29,5 prosent auke i søkartalet.
– Eg trur det kan skuldast at mange av dei ein fagskuleutdanning er relevant for jobbar i bransjar der mange no står utanfor arbeid, seier Asheim.