– Vil du ha gratis mjølk, er det berre å komme til Gjengedalsgrenda. Du skal få mjølk oppi alle «binner» du tek med deg, seier bonden Nils Magne Gjengedal.
For av og til byr livet på uvêr, ras og stengd veg for mjølkebilen.
– Slik er det no berre, seier bonden.
Sist veke raste delar av vegen ut. Sidan har ikkje mjølkebilen klart å komme fram på den smale og svingete vegen til bygda i Nordfjord.
Dette har skapt problem for bøndene i grenda.
– Eg får verken inn kraftfor til dyra eller ut mjølka til leveranse, seier Gjengedal.
Det er ikkje første gongen fat ras og uvêr skapar problem for folk i den vesle bygda. Seinast sommaren 2019 var bygda heilt isolert etter at enorme vassmengder tok ei bru.
Må kaste fleire tusen liter
Gjengedal leverer kring 2000 liter mjølk kvar gong mjølkebilen er innom. Det er kvar tredje dag. Naboen pleier å levere kring 500 liter.
Dei to gardane får ikkje levert mjølk neste gang mjølkebilen skulle ha kome heller. Dermed vil minst 5000 liter mjølk bli tømt rett i sluken.
Ville køyre mjølkebilen i møte
Bøndene har undersøkt om det finst alternative måtar å få levert mjølka på. Eit alternativ var å køyre mjølkebilen i møte med ein flyttbar tank.
– Det gjekk ikkje. Tankbilen har sine ruter dei må halde. Eg forstår at den ikkje har tid til å stå og vente på meg, seier Gjengedal.
No fyller han oppi det som er tilgjengeleg. Sjølv om bøndene får erstatning, likar dei likevel ikkje å kaste gode råvarer.
– Dette er tragisk.
- Les meir: I framtida vil «Gydaer» gi enda mer regn
Ser mørkt ut for mjølkeleveringa
Byggjeleiar Dagfinn Sande i Vestland fylkeskommune fortel at vegen er svært ustabil.
– Dette er ein svært krevjande veg å få i orden, seier han.
No jobbar dei på med å sikre vegen på undersida. Kring ein tredjepart av massen under deler av vegbana er borte.
– Dette kjem til å ta tid, og vi må nok få inn fleire fagfolk også, seier Sande.