Grov vald, kidnapping og fleire narkotikabrotsverk stod var blant tiltalepunkt då ein mann i 20-åra fekk dommen sin i Sogn og Fjordane Tingrett denne veka.
I retten nekta han straffskuld for fleire av tiltalepunkta, men vart berre frikjent på eit punkt som gjekk på kidnapping.
Mannen vart dømd til eitt år og ti månadar i fengsel, der ni månadar har ei prøvetid på tre år. Han får i tillegg trekt frå 225 dagar som han har sete varetektsfengsla i Vik fengsel.
Og det var medan han sat varetektsfengsla at han sende ein snap til ein kamerat som skulle vitne og spurde om han kunne ta på seg skulda for grove valdshandlingar.
Under ein festival i Askvoll i fjor sommar hamna han og fleire kameratar i slagsmål med ein person. Fornærma, ein mann i 40-åra, vart sendt til Førde Sentralsjukehus for behandling. 27-åringen frå Sunnfjord skal ha både sparka og slått fornærma i ansiktet så han vart liggande att, bloding og medvitslaus.
Årsaka til slagsmålet var at mannen i 40-åra skulle ha fornærma mora til den dømde 27-åringen.
I tillegg til fengselsstraff er mannen også dømd til å betala over 120.000 kroner i erstatning til tre forskjellige personar. I retten kom det også fram at mannen har eit sterkt ønskje om å endre livet sitt.