Anne Beathe Tvinnereim (Sp) er oppgitt etter at Fylkesmannen har gitt ein bonde frå Stadlandet i Selje kommune nei til å frådele eit hus på garden. Politikarar og naboar seier ja, og eit ungt Oslo-par står klare som kjøparar.
– Her prøver politikarar å legge til rette for at folk skal flytte hit, og så er Fylkesmannen så firkanta, seier ho.
Fylkesmannen meiner at mellom anna møkalukt og dur frå landbruksmaskinar kan skape konfliktar på og rundt garden.
– Ikkje grunn for frådeling
Tvinnereim seier ho forstår at ein må ta omsyn til potensielle arealkonfliktar.
– Men det handlar ofte om vegtilkomst eller køyring gjennom tunet. Fjøslukt og traktordur burde ikkje vere grunn for ikkje å tillate frådeling. Då blir det både håplaust å busetje seg på landet, og å produsere mat.
Opne for innspel
Hjå Fylkesmannen er dei opne for å vurdere saka på nytt.
– Vi ønsker å vere opne og lydhøyre viss det er gjort vurderingar som kan vere for strenge eller for liberale frå vår side, seier Nils Erling Yndesdal, kommunaldirektør hjå Fylkesmannen.
Dersom kommunen held på vedtaket sitt går saka til ein settefylkesmann fordi Fylkesmannen vert inhabil i ei ny vurdering av saka.
– Trur du det kan ha blitt gjort feil frå Fylkesmannen si side i denne saka?
– Det vil eg ikkje spekulere i. Vi er opne for innspel heilt til det er gjort endeleg vedtak i ei slik sak, seier Yndesdal.
Skjønn i saksbehandling
Tvinnereim fryktar ikkje at bruk av skjønn vil gjere det vanskeleg å handheve reglar.
– Det er derfor ein frå politisk hald legg inn noko skjønn, ingen saker er like.
– Kva betyr det for Ervik og liknande stader å få ta i bruk husa som er der?
– Det betyr alt. Det er fortrinnet for perler som Ervik, at ein kan bruke dei fine kvalitetane dei har til å tiltrekkje unge folk som vil bu der. At kommunen og lokalsamfunnet skal motarbeidast av statlege byråkratar, er berre trist.
Spør statsråden
Også stortingsrepresentant Silje Hjemdal frå Framstegspartiet er opprørt over saka.
Hjemdal har no vendt seg til kommunalminister Monica Mæland (H), der ho spør kva statsråden vil gjere for at det skal bli enklare for folk å etablere seg på bygda.
– Fylkesmannens plikt er å sørge for fornuftig handheving av lovverk, ikkje å plage folk slik det blir gjort her, seier Hjemdal.
Tvinnereim vil følgje også med på saka vidare. Ho håpar settefylkesmannen kjem til ei anna avgjerd enn Fylkesmannen.
– Viss ikkje håpar eg kommunen tek saka heilt til topps, så departementet får seie kva som var intensjonen med regelverket, seier Tvinnereim.