På denne skulen har elevar leika seg betre i matte

– Der borte ligg det lappar, så vi må springe bort og finne svaret på oppgåva som står der, forklarer Anna Klævold Kjempenes.

Ho og resten av sjuandeklassingane ved Vassenden spring stafett. Men det er ikkje kroppsøving dei har, det er norskoppgåver som står på lappane.

Ved føtene til Anna ved startlinja ligg arket med kryssordet dei skal løyse. Kvart ord skal fyllast inn, og dei byter på å springe for å finne løysinga.

– Det er eigentleg litt lettare når vi må springe imellom. For då får vi tid til å tenke!

Dei har vore med i Høgskulen på Vestlandet sitt forskingsprosjekt Active Smarter Kids (ASK) sidan 2014.

Men på Vassenden gav dei seg ikkje der, og i dag har alle elevar frå 1.–10. klasse ein halv time aktiv læring kvar dag dei ikkje har vanleg kroppsøving.

No ligg læringsopplegga Vassenden skule har fått vere med å utvikle ute for fri bruk for alle skular.

Vart betre i matte

– Det første resultatet vi ser er at den tredjedelen av elevane som har vore svakast i matematikk, har hatt stor framgang på nasjonale prøvar, fortel Øystein Lerum som er stipendiat ved Høgskulen på Vestlandet.

Sidan 2014 har Høgskulen sett på sambandet mellom fysisk aktivitet, skuleprestasjonar, trivsel og helse på femteklassingar.

– Grunnmuren i prosjektet er at barn lærer på ulike måtar. Nokre barn lærer kanskje betre ved å vere ute og jobbe praktisk, til dømes gjennom mattebingo, stafettar og leikar, seier Lerum.

Dei har no opna databasen med læringsopplegg for blant anna matte, engelsk, naturfag, geografi og norsk.

– Forskinga er jo støtta av offentlege midlar. Dette er ein måte å gi tilbake til skuleverket.

Positiv leik i skulegarden

Anne Cecilie Kapstad kan namna på dei fleste av ungane som spring rundt på fotballbana på Vassenden.

Ho er rektor på skulen, og ein av pådrivarane for å halde fram med aktiviteten sjølv etter ASK sitt forskingsprosjekt var ferdig.

– Eg trur det er viktig at elevane får bruke heile kroppen og ikkje berre sitte på pulten. Også lære gjennom fysisk aktivitet og kunst og handverk. Og ikkje minst så trur eg elevane får tømt litt av energilageret og kanskje sit litt meir i ro når dei først kjem inn på pulten, seier Kapstad.

Elevane som no går i sjuandeklasse har også laga sitt eige opplegg til databasen. Leiken «gangeball», der gongetabellen er ein viktig del av spelet.

– Vi ser når andre skular er på besøk at elevane er kjempestolte av det dei har laga. Eg har prøvd leiken sjølv også, og eg merkar at hjernen ikkje er vant til å halde på med tal samstundes som ein er aktiv!