No kan du sleppe høna di fri

– Det er ikkje noko hønseliv å sitje inne heile tida. Dei er som oss. Dei blir litt nebbete av å sitje i karantene, seier Nina Sofie Gjelsvik, som er bonde i Bygstad i Sunnfjord.

Men 1. juni fekk hønene hennar endeleg sleppe ut att i det fri, etter at husarresten for fjørfe vart oppheva.

Portforbodet vart innført etter at det i november vart oppdaga fugleinfluensa i Noreg, Sverige, Danmark og fleire land i Europa.

No reknar Mattilsynet det som trygt å la tamfuglar vere ute igjen utan tak over hovudet.

Det har ikkje vore påvist villfuglar som er døde av fugleinfluensa i Noreg sidan midten av april. Det viser den siste situasjonsrapporten frå Veterinærinstituttet.

– Det har vore et inngripande tiltak som vart innført på tampen av fjoråret, men det skal ikkje vare lenger enn nødvendig, seier seksjonssjef for dyrehelse i Mattilsynet, Anne Marie Jahr.

Hønene til Gjelsvik har levd godt i hønsehuset sidan før jul, men bonden synest det er fint at dei no får sleppe ut.

– Det er slik livet deira skal vere. Dei må løfte vengene dei òg.

Ønskjer at folk melder frå

Jahr opplever at hønseeigarar har vore lojale mot reglane.

– Folk har hatt respekt for portforbodet vi har innført. Trass i at fleire bur slik at andre ikkje kan sjå kva dei gjer i det daglege, har eg inntrykk av at folk har vore flinke å følge forbodet, seier ho.

Ho legg til at det er viktig at folk fortset å melde ifrå om døde fuglar sjølv om karantenetida er over. Fugleinfluensaen kjem nemleg tilbake med jamne mellomrom.

– Vi er veldig glade for alle tips og meldingar vi har fått inn, og det håpar vi folk fortset med, seier ho.

Stortingsrepresentant Per Espen Stoknes (MDG) meiner opphevinga av portforbodet er på høg tid.

– Når vil Noreg oppheve portforbodet for fjørfe, slik England har gjort, eller lempe på reglene slik det blant anna er gjort i Sverige og Danmark?, spurte han Landbruks- og matminister Olaug Bollestad om i mai.

Bollestad svarte at utbrot i hobbyfjørfehold eller økologiske dyrehald «fører til ein sterk auke av smittetrykket i området rundt dyrehaldet» og at tiltak «vil ramme alle fjørfehald i området rundt utbrotet».

Ho la til:

– Utgiftene vil vere store for samfunnet, og eit utbrot kan påføre fjørfenæringa store økonomiske tap. I Sverige og Danmark har det vore mange utbrot i kommersielle fjørfehald som har ført til behov for avliving av ei stor mengde dyr.

Ikkje noko liv å sitje inne

Tilbake i Bygstad trippar dei tjue hønene til Gjelsvik fritt rundt. Men dei var litt skeptiske i byrjinga, fortel Gjelsvik.

– Dei var litt usikre på «om er dette lov?». Men no har dei funne meir roa.