Ragnhild Jepsen er den nye biskopen i Bjørgvin – no er sju av tolv biskopar kvinner

I desember i fjor gjekk biskop Halvor Nordhaug av med pensjon, etter å ha hatt jobben sidan 2009.

No er det avgjort at Ragnhild Jepsen blir hans etterfølgjar. Fredag føremiddag var ho på plass i Bergen Domkirke.

– Det er ein stor dag for meg, seier Jepsen.

Ho trur det var heilt naturleg at tida var komen for ei kvinne i bispestolen i Bjørgvin.

No vil ho prioritera å gjera seg godt kjend i området. I dag bur ho i Trondheim.

– Eg vil bli kjend med både folk, geografien, og korleis folk lever og bur og trur her.

Ho peikar også vidare på andre oppgåver ho ser på som viktige.

– Eg vil ta fatt på å auka rekruttering, skapa gode rom der folk kan feira gudsteneste og leva godt saman, og å gjera kyrkja til ein sentral aktør i samfunnslivet.

Åtte av kyrkjerådet sine medlemer stemte på Jepsen.

Dei andre kandidatane, sokneprest Sunniva Gylver og sokneprest Kjersti Gautestad Norheim fekk høvesvis seks og to stemmer.

– Leverer på det eine området etter det andre

– Ho har solid leiarerfaring, og vil kunne fungera som ein tydeleg, trygg og god leiar frå fyrste stund. Ho er ein fantastisk liturg, og ein veldig god forkynnar, seier kyrkjerådsleiar Kristin Gunleiksrud Raaum til NRK.

Raaum trur Jepsen vil vera ein synleg og tydeleg biskop. Ho vil og vigsla likekjønna.

– Det har ho gjort, og vore veldig tydeleg på, seier Raaum.

Ragnhild Jepsen er fødd i 1969, og er oppvaksen i Ål i Hallingdal. Ho har vore domprost i Nidaros bispedøme i elleve år og ikkje arbeidd eller budd i Bjørgvin bispedøme før.

Far hennar vart fødd på Stord, og familien på morssida kjem frå Bergen og Os.

Ho var den som både biskopane og bispedømerådet prioriterte høgast då dei hadde frist til å uttala seg 20. januar.

Jepsen blir vigsla som biskop i Bjørgvin den 16. april. Då vil kongen vera til stades.

Lang og vanskeleg prosess

Biskopen i Bjørgvin har ansvaret for å leia det som er det største bispedømet i landet, i tillegg til dei 29 sjømannskyrkjene rundt om kring i verda.

Prosessen med å finna ein ny biskop starta i fjor haust. 2. september offentleggjorde bispedømet dei 96 namneforslaga som hadde kome inn.

18. november nominerte bispedømerådet fem kandidatar til stillinga.

Sidan vart Kjersti Gautestad Norheim presentert, etter ein supplerande nominasjon.

6. januar i år vart dei tre kandidatane med flest rådgjevande stemmer offentleggjorde. Allereie då var det klart at den neste biskopen kom til å vera ei kvinne, då det var tre kvinner som stod att.

– Eg vart litt overraska over at det stod tre kvinner att. Vestlandet har alltid lege litt etter. Men heilt frå grasrota har det vore udiskutabelt at ein ynskja ei kvinne, seier Berit Andersen, som i 1976 vart den fyrste kvinnelege presten i Bjørgvin bispedøme.

Den nye biskopen meiner fleire ting viser at tida var moden for ei kvinne som biskop i Bjørgvin.

– Først så har bispedømerådet gjort ein god jobb med å nominera kvinner, og så seier det noko om at folk tenkjer at det å vera kvinne og prest er ein naturleg ting, seier Jepsen.

Ho meiner ein ikkje spør så mykje etter kjønn lenger, men heller ser på kva slags eigenskapar folk har med seg.

Arbeidet med å velja den rette biskopen har vore vanskeleg, seier kyrkjerådsleiar Raaum.

– Det er det privilegiet og problemet me har når me har hatt tre gode kandidatar.