Naudetatane rykte ut til feil kommune

Det var rundt klokka 07.40 at politiet meldte at ein bil hadde køyrt inn i eit tre ved kyrkja i Førde. Det synte seg etter ei stund at det var i nabokommunen Gaular det hadde skjedd. Naudetatane bomma med 23 kilometer.

– Naudetatane rykte ut til Førde kyrkje, men det synte seg ganske fort at det var tale om Sande kyrkje i gaular, seier operasjonsleiar i Vest politidistrikt Lars Geitle.

– Korleis kunne det skje?

– Det var ei misforståing knytt til kor uhellet hadde vore. Det vart oppfatta som Førde kyrkje, men det gjekk berre nokre minutt før det vart oppklart.

Som ein ser på biletet fekk bilen som køyrde inn i eit tre store skadar, men føraren av bilen er lettare skadd. Det er ikkje mistanke om promillekøyring.

Trur ikkje feilen har hatt noko å seie

Det var operasjonssentralen til politiet i Bergen som fekk inn meldinga. Etter at Sogn og Fjordane og Hordaland politidistrikt vart slått saman til Vest politidistrikt, har det kome fleire klagar på at det er vanskeleg å få kontakt med dei.

Det gjekk 16 minutt frå politiet meldt om uhellet ved Førde kyrkje, til dei kom ut med ei retting der dei presiserte at det var tale om Sande kyrkje.

– Men dei minutta har ikkje hatt noko å seie.

– Men om det hadde vore ei alvorleg ulukke der folk var kritisk skadde, kunne dei minutta ha vore viktige?

– Ja, det kan du sei. Men det er no ein gong slik at i eit hektisk meldingsmottak er det ikkje alltid vi har rett stad med ein gong, seier Geitle.