Neste veke skal nesten alle ha fått att mobildekninga

Framleis er innbyggjarane i Davik og på Bakka utan mobildekning, tre veker etter at stormen «Dagmar» herja Sogn og Fjordane.

På det verste var 40.000 abonnentar i fylket utan mobildekning, og einskilde stader har det teke svært lang tid å få på plass att mobilnettet.

• LES OGSÅ: Kundar rasar mot Telenor
• LES OGSÅ: – Teleberedskapen er betre i utviklingsland enn i Norge

Forstår frustrasjonen blant folk

– Status er at eg kan stadfeste at vi har hatt ei mast som Nor Kring eig, som har rasa i hop i dette området. Tida fram til onsdag i førre veke vart nytta til å rydde skog og området rundt. No tek vi til med å byggje den nye masta, men dette vil ta ytterlegare tre veker, seier dekningsdirektør i Telenor, Bjørn Amundsen.

Han uttrykkjer stor forståing for dei som endå ikkje har fått att mobildekninga si i Sogn og Fjordane.

– Eg skal vere den første til å innrømme at eg forstår at folk er frustrerte over at mobilnettet har vore ute i tre veker, og iallfall over at mobilnettet kanskje vert ute i tre veker til, seier Amundsen.

• LES OGSÅ: Post- og teletilsynet vil setje strengare krav til teleoperatørane
• LES OGSÅ: Telenor: - Teleberedskapen er like god no som den var tidlegare

Tek sjølvkritikk

I mellomtida vurderer Telenor andre tiltak for å lette kvardagen for innbyggjarane på Davik.

– Vi har vedteke at vi på måndag kjem til å sjå på korleis vi kan løyse dette mellombels. Då kjem vi til å gjere alt vi kan for at iallfall tettstaden Davik skal komme opp på lufta med mobil i løpet av neste veke, seier Amundsen.

Han tek sjølvkritikk på at det ikkje har vore gjort meir tidlegare.

– Det er mogleg vi burde ha komme med ei mellombels løysing før, det tek eg sjølvkritikk på, seier Amundsen.

• LES OGSÅ: Framleis mange utan mobilsamband

Berre Bakka att

Når Davik er oppe og går med mobilnett, er det berre innbyggjarane på Bakka i Nærøyfjorden som framleis manglar mobilsamband.

– Der har ein trengt eit kabelskip for å kunne reparere skadane etter Dagmar, og eg trur dei skal klart å reparere det tidleg neste veke. Då er vi endeleg à jour etter skadane etter Dagmar i Sogn og Fjordane, seier Amundsen.