Raftoprisen går kvart år til personar eller organisasjonar som arbeider for å fremme menneskerettane.
Årets vinnar er Nodjigoto Charbonnel, grunnleggar og leiar for organisasjonen AJPNV.
Han kjempar for dei som er offer for tortur i heimlandet.
– Ingen bryr seg om situasjonen i Tsjad. Folk flest veit ikkje ein gong kvar landet ligg, seier Charbonnel.
– Folk mistar ofte alt
Ingeniøren har opplevd grov tortur mot sin eigen far. Han har sjølv mista levebrødet fordi han har engasjert seg i humanitært arbeid.
På ein dårleg videolink frå hovudstaden N`Djamena fortel han om kampen organisasjonen har stått i dei siste 22 åra.
– Folk mistar ofte alt når dei blir offer for tortur. Vi er den einaste organisasjonen som arbeider for å gje desse fysisk, psykisk og praktisk hjelp, seier han.
AJPNV har jobba i Tsjad i 22 år. Men Charbonnel skildrar ein forverra situasjon etter kuppet i fjor.
Samstundes kjem det store mengde flyktningar frå ulike konfliktar i nabolanda.
Meiner verda har gløymd Tsjad
– Når storsamfunnet ikkje reagerer på grove brot på menneskerettane, då held brota fram, seier leiar Line Alice Ytrehus av priskomiteen i Raftostiftinga.
Ei grunngjeving for årets pris er å få merksemd på ei konflikt som har fått eskalere utan merksemd i vestlege medium.
Krigen i Ukraina er noko av forklaringa på det, meiner Ytrehus.
– Det har alltid vore vanskeleg å få merksemd på Afrika. Men særleg no når alle auge er retta mot ei konflikt nærare oss. Media har eit ansvar for å sette lys på grove menneskerettsbrot.
Tsjad ligg i Nord-Afrika. Plasseringa gjer landet til viktig i kampen mot ulike terrororganisasjonar, meiner Raftostiftinga.
Dei meiner internasjonale land og organisasjonar gjev situasjonen i Tsjad lite merksemd.
– Han driv ein veldig modig kamp for å avskaffe tortur i eit land der tortur vert brukt systematisk og rutinemessig mot sivilbefolkninga, seier Ytrehus.
Prisutdeling i Bergen
Raftostiftinga jobbar no med å få Charbonnel til Bergen 13. november for å ta imot sjølve prisen på 20.000 dollar.
– Det er usikkert om eg kan komme. Det er heilt avhengig av korleis regimet her ser på prisen, seier han.
Han er open på at tildelinga av Rafto-prisen kan skape problem for han og organisasjonen hans.
– Eg veit ikkje heilt korleis styresmaktene tenker. No har litt av verdas søkeljos blitt retta mot oss.
Han skildrar arbeidet som farleg og vanskeleg. Men han takkar stiftinga i Bergen for å gje dei ny energi i kampen for menneskerettar i Tsjad.
Tsjad er eit av dei aller fattigaste og minst utvikla landa i verda.