Marit vitja sommarbåten

– Vi er litt spente. Eg prøvar å tenke på at det ikkje er direkte, sa Aina Krakset, mor til Marit frå tv-serien «Marit og dyra» før sendinga starta.

Heldigvis var det kjende ansikt å sjå; fotograf Arne Stubhaug frå serien har også mønstra på båten, og gjensynsgleda var stor.

– Vi har nokre vener med leilegheit på kaia her, så vi stod og vinka til han då båten kom inn tidlegare i dag, fortel Krakset.

• NETT-TV: Her kan du sjå Marit og Aina gjeste Sommearåpent på NRK1

Flotte tilbakemeldingar på serien

«Marit og dyra» er produsert av NRK Sogn og Fjordane og har gått på NRK Super i vår. Serien handlar om Marit (no 7 år) som bur på Hakkalegarden i Vanylven og ikkje minst alle dyra på garden.

• Les meir om serien og sjå alle episodane her

– Vi har fått mange flotte tilbakemeldingar, og besøket på garden har teke seg opp! Vi merkar at folk har sett på, og dei som kjem spør ofte konkret etter visse dyr, seier Aina.

– Det har vore litt travelt med alle som vil snakke med meg, men mest kjekt, seier Marit sjølv.

Stas med sommarbåten

Sjølv om ho hadde trua på at denne typen serie skulle slå an, er også programskaparen Eva Westvik svært nøgd med responsen.

– Vi har fått enormt mange koselege tilbakemeldingar om at ungar set veldig pris på historiene om livet på garden. Garden ligg jo veldig flott til, med Stadhavet rett utanfor, og ikkje minst med dyra i alle fargar og fasongar. Mange foreldre har fortalt at ungane er heilt avhengige av serien, og det var morosamt å sjå ungar med serien på iPad då eg nyleg var på ferie, seier Westvik som er glad for at NRK Underhaldning har valt å fronte serien i kveld.

Sommarbåten har segla langs kysten i tre veker, og i dag kom den til Ulsteinvik. Tysdag står Sogn og Fjordane for tur. Her skal båten vitje Florø (14. juli), Sogndal (15. juli), Høyanger (16. juli) og Skjerjehamn (17. juli).

• Her kan du følge sommarbåten: NRK Sommer