Svært mange sjåarar koste seg med NRK sin sommarbåt si ferd i Sogn og Fjordane førre veke. Flest sjåarar var det då båten ankra opp i Sogndal, men overalt kor båten gjekk, var det uvanleg mange som benka seg framfor TV-apparata.
– Sommarmånadane er vanlegvis lågsesong for TV-sjåing, og det er svært gledeleg at så mange valde å sjå TV-sendingane frå Florø, Sogndal, Høyanger og Skjerjehamn, seier redaktør i NRK Sogn og Fjordane, Kai Aage Pedersen.
Når ut til eit stort publikum
M/S Sjøkurs har dei siste vekene heldt stø kurs frå Finnmark til Vestlandet, og overalt har NRK-skuta blitt møtt med flagg, folk og ein armada av småbåtar. No er båten på veg sørover gjennom Hordaland, og torsdag kveld er sendinga frå Bekkjarvik.
– Det er vel ingen tvil om at det har vore utruleg flotte sendingar. Dette er ein svært kjekk måte å nå ut til NRK sitt store publikum på, meiner Kai Aage Pedersen.
Eit av høgdepunkta under toktet gjennom Sogn og Fjordane, var utan tvil 15 år gamle Annika Beinnes frå Vadheim. Ho steppa inn på kort varsel for ein sjukemeld Olav Stedje, og song så tårene spratt på både TV-sjåarar og publikum på kaia i Høyanger.
- Les også:
- Les også:
- Les også:
- Les også:
Tusenvis av sjåarar på nett
I ettertid har fleire tusen teke seg tida til sjå nettklippet med Annika sin song, og det har kome mange kommentarar på sosiale medium til den talentfulle tenåringen.
– Innslaget med Annika var jo ikkje anna enn imponerande, og syner vel tydeleg at vi har mange flotte og flinke talent her i fylket. Ein kan vel kanskje seie at ei stjerne blei fødd den kvelden, slår distriktsredaktør Kai Aage Pedersen fast.
