Det oppstod ei beredskapshending på Osland havbruk i Høyanger då det dukka opp ein ubunden gjest i laksemerden.
Makrellstørja vog 330 kilo, og var 282 centimeter lang.
Dagleg leiar i Osland Havbruk, Marte Hatlevik, seier dette er fyrste gong dette skjer i selskapet.
– Det vart oppdaga ved oppstart av fôring i dag tidleg. Det vart sett beredskapsgruppe med ein gong, og sendt ut vaktlag og servicebåt, seier Hatlevik til NRK.
Ho seier dei tek hendinga alvorleg, og at dei jobbar for å unngå rømming.
Makrellstørja vart fanga med orkastnot, og avliva av jeger.
Det er framleis arbeid på staden for å hindra rømming av laks, med fleire ressursar i sving.
Jeger på merdkanten
Havbruksselskapet har hatt dialog med Fiskeridirektoratet gjennom heile dagen, og har jobba med å identifisera og tetta hol i merden.
– Det er uvanleg for oss at det må ein jeger ut på merden, seier Hatlevik.
Fisken vart avliva av jegeren med jaktrifle, med spesialløyve frå Fiskeridirektoratet.
Makrellstørja blir levert til eit fiskemottak i Bergen, og blir nytta til mat.
Ein kan undrast over kor mange munnar ein fisk på 330 kilo kan metta.
Svømte jorda rundt
Makrellstørje er ein dyktig svømmar, og kan nå ein fart på rundt 70 kilometer i timen, og blir av og til kalla «havets Ferrari».
I tillegg til å svømma fort, kan dei òg svømma langt. I fjor skreiv NRK om makrellstørjer som svømte jorda rundt.