Biletet i toppen, som ein representant for Statsforvaltaren tok ein vinterdag i fjor, viser kjernen i ein strid om lokalt sjølvstyre, privat eigedomsrett, nasjonale interesser og barns rett til leikeområde.
For Birte Skjold Hansen viser fotografiet ein privat barnebursdagsfeiring med aking og leik på innmarka til småbruket der ho vaks opp.
For Statsforvaltaren peiker fotografiet mot «nasjonale interesser» knytt til rekreasjon, «grøne verdiar» og barneleik.
Med bilete som argument har Statsforvaltaren difor oppheva Skjold Hansen sitt løyve til å byggje hus på den same bøen.
Kommunen sa ja til husbygginga i fjor.
– Eg har lyst til at barna mine skal få lov å ha den nærleiken til dyra, foreldra mine og denne garden som eg sjølv har hatt, seier Skjold Hansen, som ikkje har gjeve opp kampen.
Staten vil ikkje omgjera vedtaket
Striden om huset, bøen og akebakken har vekt nasjonal merksemd, og i ein ny omdreiing har saka gått heile vegen til departementet.
Der er svaret at dei ikkje vil involvere seg.
I eit skriftleg svar skriv kommunalminister Sigbjørn Gjelsvik (Sp) at det etter reglane i forvaltningslova ikkje er grunnlag for departementet til å gjera om vedtaket frå statsforvaltaren.
Han legg til at vedtaket til Statsforvaltaren ikkje er bestemmande for framtidig bruk av arealet.
«Kommunen har moglegheit til laga ein reguleringsplan som legg til rette for bygging av bustad. Eit anna alternativ kommunen har, er å endre kommuneplanen slik at bustaden det er søkt om ikkje er omfatta kravet om reguleringsplan,» skriv kommunalministeren.
– Statsforvaltaren burde ikkje ha blanda seg inn
– Eg klarer ikkje å sjå at det her er så store allmenne interesser at det skulle vera grunnlag for å overprøva lokalt sjølvstyre i denne saka, seier Nils T. Bjørke, som er stortingsrepresentant for Senterpartiet.
Han legg til:
– Så eg kunne ønskt at departementet ville sjå på det.
Stortingsrepresentant for Frp, Helge André Njåstad, har også signalisert at kommunalministeren bør gripe inn.
Bjørke meiner det er viktig å sikra allment tilgjengeleg areal, men at Statsforvaltaren skulle ha halde seg unna ei så lita byggesak som bustadhuset på denne innmarka.
– Her kan ein med litt smidigheit kombinera begge interessene. Det har kommunen vurdert, og derfor gjeve dispensasjon til husbygginga. Då burde ikkje Statsforvaltaren ha blanda seg inn.
Taus statsforvaltar frå Senterpartiet
Ekstra pikant er det at tidlegare Senterparti-leiar Liv Signe Navarsete i september overtok som statsforvaltar i Vestland, kort tid etter at forgjengaren hennar klaga på byggesaka.
Etter eige utsegn er Navarsete generelt «tilhengjar av at kommunane skal ha mest mogleg handlefridom», men ho vil ikkje uttale seg til NRK om denne konkrete saka.
Først ville ho ikkje kommentera før settestatsforvaltaren i Rogaland hadde behandla saka ferdig.
«Eg finn det ikkje rett å uttale meg om saka no», skreiv ho til NRK.
Etter at kollegaen i Rogaland gav Statsforvaltaren i Vestland medhald, viser Navarsete likevel tilbake dit.
«For min del handlar det om ei sak som var ferdig handsama frå embetet til Vestland i god tid før eg starta i jobben som statsforvaltar. Då vert det uryddig å uttale seg,» skriv ho.