– Spesielt i vinter har det vore vanskeleg å finna noko, seier Endre Lian.
Han set opp eit øvingsstilas i vårsola ved Aker Solutions-verftet på Stord. Det er ikkje så høgt, men på verftsområdet ventar skyhøge stillas på plattformer og andre installasjonar.
I tre månader skal Lian og tre andre unge menn lærast opp til å bygga og sikra stillas på Aker Solutions på Stord.
Går det rette vegen, kan dei om fleire år enda opp med fagbrev.
– Det var veldig frigjerande. Endeleg fekk eg ei god moglegheit, seier Lian.
Tre av fire er innleigde frå utlandet
Noreg kjem til å mangla 70.000 fagarbeidarar fram mot 2035, ifølgje Statistisk sentralbyrå.
Den siste tida har verftet på Stord hatt 125 stillasarbeidarar i sving. Av dei er berre ein firedel eigne tilsette. Resten er leigde inn.
Fleire andre fag er i same situasjon.
– Stillas, isolasjon og måling er særleg utfordrande. Men me treng fleire fagarbeidarar på ei rekkje andre område også, seier verftsdirektør Jarle Henriksrud.
Rekrutteringa av arbeidssøkjarar til stillas var planlagd før korona stengde grensene.
– Me har hatt problem med rekruttering i mange år. Når grensene no er stengde for utanlandske fagarbeidarar, merkar me endå meir på kroppen at dette er krevjande for oss, seier Henriksrud.
Norsk Industri stadfestar at dette er eit problem i heile landet.
– Ein har lenge sett at arbeidsstokken har vore aldrande, og ser at i løpet av rundt 15 år, vil ein stor del av dei faglærte i desse faga vera pensjonerte, seier Anita Leirvik North, som er dagleg leiar for Korrosjons, isolerings- og stillasentreprenørens foreining i Norsk Industri.
Arbeidsledige manglar kompetanse
Nav har samarbeidd med Aker Solutions om rekrutteringa av stillas-elevar. Dei kallar det eit pilotprosjekt, og håpar det blir utvida.
– Arbeidsgjevarar har behov for kvalifisert arbeidskraft, og me har mange arbeidsledige som manglar rett kompetanse. Her er det eit hol me må fylla, meiner marknadsansvarleg i Nav Sunnhordland, Sindre Vikanes.
Han trur korona tydelegare har vist behovet for norske fagarbeidarar.
– Det er noko me lenge har tenkt å satsa på, og det er blitt endå viktigare no.
Ifølgje Nav var det enkelt å finna aktuelle kandidatar blant dei arbeidsledige.
– Det kan vera folk som har droppa ut av skulen, at dei ikkje får fullført læretida si. Nokon kan ha hatt helseutfordringar, behov for tilrettelegging eller har sosiale problem.