– Då båten dukka opp på nettet, visste eg at det var den eg ville ha, fortel Chris Martin Erstad frå Radøy i Hordaland om den 96 år gamle skøyta.
Han reiste til Kvinesdal i Vest-Agder for å kjøpe den i 2016. Båten var i dårleg stand, og kom berre 200 meter frå land før dei fekk problem med giret. Tre helger tok det å reparere skøyta.
Utanfor Jæren blei det alt for mykje vatn i båten. Dei måtte ha hjelp frå Redningsselskapet. Til slutt fekk dei likevel båten heim til Radøy.
– Sidan har eg stått på alle ledige dagar og helger for å få den i stand, fortel Erstad til NRK.
Fekk sjokkbeskjed
Måndag denne veka fekk han ei telefonsamtale på veg heim frå Haugesund. «Aladdin» hadde sokke til botn i Indre Taulsvågen på Radøy.
Han måtte ringe opp att å spørje om det var sant at båten ikkje flaut, og det var det.
Truleg er det eit kjølerøyr, som har sprunge lekk.
Bygd i 1920
«Alladin» er ein 46 fot stor kutter, bygd på Svanøy i 1920. Då Erstad kom heim sette han i gong med å prøve å få båten opp frå sjøbotnen.
– Eg begynte å mobilisere folk og utstyr for å få den opp. Det viste seg at berre masta stakk opp av vatnet.
– Flagget hadde eg gløymt å ta ned, så det vaia over havoverflata.
Han og fleire kameratar har prøvd å heve båten i tre dagar, utan å klare det.
– Vi er jo berre ein venegjeng så det skal litt til.
Erstad hadde mange planar for båten. Nye materialar var bestilt. Mellom anna drøymde han om ein tur til Shetland, ei reise båten også tidlegare har vore på.
Ventar på kranbåt
Etter at Chris Martin Erdal delte biletet av båten på Facebook, har mange tilbode seg å hjelpe. Nokon har og starta å vippse pengar til redningsarbeidet.
I dag, laurdag, har han håp om å få heva båten. Då kjem ein kranbåt til staden. Han skal hjelpe med det siste løftet. Måler er få båten tømt for vatn.
Erstad er ikkje sikker på at redningsforsøket vil lykkast, men lovar å stå på til båten flyt igjen.
– Det vil jo koste ein del pengar, men eg gjer meg ikkje. Eg skal stå på til alt er i orden igjen, seier Chris Martin Erstad.