Her er dei vande med bilberging

Fredag ettermiddag vart ikkje noko unntak. Igjen køyrde ein semitrailer seg fast mellom Honning bru og Maristova på E16 i Lærdal.

– Denne gongen er det ein polsk bil, utan kjetting, fortel Knut Maristuen.

Han driv Maristuen Fjellferie AS og har måtte lære seg å leve med at tyngre køyrety køyrer seg fast og sperrar vegen.

• LES OGSÅ: Vogntog-kaos på svært glatt fjellovergang
• LES OGSÅ: Krev strengare grensekontroll

Det har blitt verre

Knut Maristuen er oppvaksen på Maristova på Filefjell. E16 som går like ved er både smal og kronglete i området mellom Maristova og Honning bru. Det er ikkje reint få gonger at Maristuen har opplevd fastkøyrde vogntog her.

– No når det snør er det nesten blitt kvardags, seier Maristuen og legg til:

– Det er dette som pleier å skje. Når det kjem snø, blir det fort litt kaos.

Maristuen meiner problemet med fastkøyrde vogntog har blitt stadig verre dei seinare åra, men seier det er vanskeleg å kome med noko god forklaring på kvifor.

Det skal bli bygd ny veg forbi det trøblete vegstykket, og Maristuen håpar dette då skal bli betre. Dei vel to kilometerane mellom Maristova og Honning bru er eit kjent problemområde.

– Det er så trongt her, og når bilane då møtest må dei ofte stogge. Mange får då store problem med å kome seg i gang igjen, seier Maristuen.

• LES OGSÅ: Køyrde rundt med eitt hjul for lite
• LES OGSÅ: Bilbergarar tek utanlandske vogntog i arrest

(Artikkelen held fram under biletet)

– Håplaust

Sjølv om dei er blitt vande med problemet med vogntog som køyrer i grøfta, betyr ikkje det at dei har slutta å irritere seg over det. Ein tur ned til Borgund, for å kome seg til skule, barnehage og butikk, går slett ikkje alltid utan problem.

– Det er håplaust. Når du reiser ned veit du aldri om du kjem deg heim att, seier Maristuen.

• LES OGSÅ: Berre ei av to bøter blir betalt

Sist laurdag måtte familien vente i nesten fem timar på grunn av bilberging.

– I går gjekk det heldigvis fortare, men det er kjedeleg å aldri vite om ein må vente for å kome seg heim eller ikkje, seier Maristuen.

Han prisar seg lukkeleg for at Viking har fleire redningsbilar som kan rydde opp. Fredag ettermiddag var E16 stengd i vel 45 minutt for å få berga den polske semitraileren.