Bråket utanfor fekk Jan Mo raskt ut i fjøsdøra.
- Det var eit kraftig spetakkel ute. Det var kraftige drønn, og eg såg halvstore steinar kome nedover ura. Det vart ganske mykje røyk, fortel Jan Mo til NRK.no.
Losna høgt i fjellet
Raset gjekk kvart på åtte onsdag morgon i fjellsida over Mo i Lærdal. Finn Mo som bur på nabogarden seier raset gjekk i ei renne der det har gått ras før, men at raset onsdag morgon var større enn på lenge.
- Det losna ei blokk på nokre kubikk vel 600-700 meter oppe i fjellet. Dette vart knust nedover fjellsida, men til alt hell stogga det der fjellet flatar ut, fortel Finn Mo.
Steinane har spreidd seg utover eit område som er vel 100 meter breitt oppe i ura. Heldigvis stogga steinane vel 150 meter frå husa til Finn og Jan Mo.
- Men det ligg knyttnevestore steinar heilt ned til morellehagen, og desse må vi nok plukke vekk for hand, seier Finn Mo.
Høyrde kraftige drønn i fjellsida
Ved årsskiftet 2003-2004 gjekk det fleire store ras i same renna, og gardbrukarane seier raset i dag er det største sidan.
- Det var kraftige drønn då det kom ned fjellsida, fortel Jan Mo.
Det har dei siste åra gått fleire steinras i fjellsidene i Lærdal. I mai i 2009 vakna Ola Geir Hunderi av at fleire tusen kubikkmeter med stein rasa ved Hunderi.
- LES OGSÅ:
- LES OGSÅ:
(Artikkelen held fram under biletet)
- Vi held oss nok unna fjellsida i dag
Saman har dei to gardbrukarane eit felles morellefelt like under fjellet. Der var planen eigentleg å gjødsle i dag, men etter at fjellet har vist sine krefter vert arbeidet truleg utsett.
- Det er nok ikkje noko særleg god idé å reise oppunder fjellet i dag. Det har vore ein kald vinter, og då er det alltid ein del stein som vert sprengd laus av frosten, seier Jan Mo til NRK.
Ingen grunn til evakuering
Både Jan og Finn Mo seier dei har lært seg å leve med rasfaren i fjellet. Husa og gardsbygningane er samtidig så langt i frå fjellsida at dei kjenner seg trygge.
- Det er alltid noko stein som dett ned frå fjellet om våren, men vi lever med det og tek omsyn til det, seier dei begge.
Politiet og Lærdal kommune har hatt representantar på staden for å undersøke raset. Dei har ikkje funne det nødvendig å evakuere folk i området.