17 av 50 skirenn avlyste i vinter - skikrinsen overraska over at ikkje fleire vart kansellerte

Det har vore krisestemning hos enkelte skianlegg denne vinteren, men til og med administrasjonssjef Yngve Thorsen hos Sogn og Fjordane skikrins er overraska over kor mange renn som er avvikla.

• LES OGSÅ: Skisentera må på tiggarrunde

– Vi har gjennomført veldig mykje av aktiviteten vår når det gjeld rennavvikling og den biten. Sjølvsagt er svært lite gjennomført etter oppsett terminliste, men vi har fått gjennomført veldig mykje ved å flytte rundt på renna, seier Thorsen.

Sogndal tok unna

Veldig mange av helgane har dei lokale skihåpa måtte ta turen til Sogndal og Hodlekve.

• SJÅ: Oppdatert vêrmelding hos yr.no

(Artikkelen held fram under biletet)

– Det er ikkje tvil om at både langrenn- og alpingruppa i Sogndal har vore svært viktige i høve til at vi har klart å skape renntilbod nær kvar helg, seier Thorsen.

• LES OGSÅ: Lite snø er dårleg nytt for rekrutteringa
• LES OGSÅ: Måtte gje frå seg Hovudlandsrennet

– Det har vore hektisk, men det er berre positivt. Slik vi har sett det, så er det viktigaste at ungane får gå på ski – uansett kvar det er, seier Dag Henning Hove i langrennsgruppa til Sogndal.

Gode forhold

Langrennsgruppa i saftbygda skulle etter planen arrangere eitt krinsrenn. I staden er det blitt fem, der tre er i samarbeid med opphavleg arrangørklubb.

For her har det vore kjempeforhold sidan romjula og sogndølane har på kort varsel kunne teke på seg arrangement.

• LES OGSÅ: Mange sparar pengar på snøfattig vinter

– Skikrinsen har vore veldig hjelpsame med å få ordna ting, og ved dei høva der vi berre har hjelpt til, så er det med løypekøyring, tilrigging og eigentleg berre vise dei kvar ting er, seier Hove og legg til at fleire renn ikkje nødvendigvis treng bety stor økonomisk vinst.

Avlyste 17 av 50 renn

Ei rask oppsummering av terminlistene til skikrinsen, viser at seks av dei planlagde alpinrenna i vinter vart avlyste.

På langrennssida er talet noko høgare, men 18 av 29 gjennomførte renn er overraskande med tanke på korleis vinteren har vore.

• LES OGSÅ: Heile bygda stilte opp for KM-arrangør
• LES OGSÅ: Slik fekk dei snøen på plass

– Her er det ikkje all verda som er avlyst om ein ser vekk frå turrenna no på vårparten. Ser vi frå perioden 1. januar til utgangen av mars, så er det faktisk berre ei helg vi ikkje har hatt tilbod om langrennsarrangement, seier Thorsen.

(Artikkelen held fram under biletet)

Avlyste turrenn

Sesongen er ikkje heilt over sjølv om vi er godt i gang med april. Førstkommande helg arrangerer nemleg Sogndal og Haugen IL Fjord1-finale på Hodlekve. Denne skulle etter planen gått på Harpefossen.

• LES OGSÅ: 15-åringar vart landets beste

Med påska like om hjørnet, skulle det også vore duka for fleire tradisjonsrike turrenn, men Hafslovatnet Rundt, Rypeskarrennet og Holmøyskarrennet er alle avlyste grunna snømangel.

– Det er veldig synd. Vi veit at renna er populære og mønstrar mange store og små, mosjonistar og konkurranseløparar, seier Thorsen.

– Vanskelege å flytte

Skjærtorsdag kan langrennsentusiastane likevel få leggje ut i langrennssporet. Bjønnarennet i Luster skal arrangerast, men blir flytta frå Breheimssenteret under Nigardsbreen til Leirdalen.

– Sjølv om vi har fått arrangert mykje i vinter, så viser det viser korleis sesongen og snøforholda har vore i vinter. Og turrenna er vanskeleg å flytte rundt på sidan arrangementa er veldig stadbotne, avsluttar han.