I 2021 importerte vi over 1.6 millionar bildekk frå Russland, det meste av det vinterdekk.
Men etter krigen i Ukraina starta er det stopp på all import av dekk frå Russland.
Og som NRK skreiv om april, spådde bransjen både høgare priser og dekkmangel inn mot den kommande vintersesongen.
– Vi har hatt betydeleg fleire kundar enn tidlegare som har vore innom for å handle eller forhøyre seg pris, seier Hallgeir Grov i dekkforhandlaren Førde Vulk.
Sjølv om det blir laga vinterdekk i fleire land, har fleire av dei største dekkprodusentane hatt fabrikkar i Russland.
Utfordringar for kunden
Førde Vulk er blant dei forhandlarane som er heldige med lagringskapasiteten for dekk.
Det gjer at dei kan bestille inn dekk mykje tidlegare enn det andre forhandlarar kan.
Men også hos dei vil det vere kundar som ikkje får dei dekka dei vil ha.
– Ut over hausten og inn mot dekkskiftesesongen vil leveranseproblema bli meir merkbare for kunden, seier Per Kristian Neste i Dekkimportørerens Forening.
Kor store desse problema blir er det vanskeleg å seie noko om før ein får talfesta kor stor mangelen på dekk er.
– I ytste konsekvens må ein la bilen stå
Det er ikkje lange tida før det blir frost og glatt på dei første vegane her i landet.
Knut Olav Røssland Nestås i Trygg Trafikk Vestland peiker på at det finst ein del bilistar der ut som kvar vinter tar sjansen på å køyre bilen utan vinterdekk.
– Og det er derfor vi allereie no ber folk sjekke om dei må byte ut dekka dei bruker på vinteren, seier Røssland Nestås.
Med glatt føre og dårlege eller ingen vinterdekk bør ein bilen stå stille.
– Så ja, i ytste konsekvens må ein la bilen stå om ein ikkje har dekk, seier leiaren for Trygg Trafikk Vestland.
Tollreglar stoppar import
For Neste i Dekkimportørerens Forening er svaret på korleis ein skal løyse utfordringa med dekkimporten klar.
Rundt om i Europa har fleire dekkprodusentar lager kor det ligg ei mengde dekk som kunne ha vore på den norske marknaden.
Dekka er produserte i Russland, men importert ut av landet før krigen i Ukraina starta.
Dei er tilgjengelege for andre land, men ikkje i Noreg på grunn av tollreglar.
– Så no diskuterer vi med Utanriksdepartementet om vi kan finne ei løysing på dette, seier Neste.