Etter å ha fått smake på sommaren på Vestlandet har denne veka vore prega av låge temperaturar.
På Stord vart det ei heilomvending då temperaturen gjekk frå over 20 grader måndag til 7 grader onsdag.
«Shorts den eine dagen og skjerf den neste – her gjeld det å halde tunga rett i munnen når ein skal kle på seg», skriv Metorologene på Twitter.
– Slik det ser ut no er det lite som tyder på at vi skal tilbake til sommaren med det første, seier statsmeteorolog Julie Solsvik Vågane.
Tørt og kaldt
– No har vi hatt veldig fint vêr med sønnavind og lite nedbør i helga som var. Frå tysdag snudde vinden, og då ser vi ein tydeleg nedgang i temperaturen, fortel meteorologen.
Verken denne helga eller i neste veke vil temperaturane krype over ti grader.
– Dei ti komande dagane held temperaturen seg på dette nivået, seier Solsvik Vågane.
Om nettene er temperaturen venta å ligge på rundt null grader fleire stader.
– Nattefrosten er skummel, og det er nok lurt å vente med å skifte dekk på bilen, seier meteorologen.
- Her finn du krav til dekk og reglar for piggdekk.
Vinden kjem frå ei nordleg retning. Møre og Romsdal må bu seg på regnbyer i helga, medan Vestland derimot går klar nedbøren dei komande dagane.
Vêrvinnarar i aust
I starten av neste veke kan det bli både vått og kaldt i vest.
– Folk får nyte helga vi har i vente. I løpet av neste veke vil det kome litt nedbør, er beskjeden frå meteorologen.
Sidan vinden kjem frå ei nordleg retning litt Austlandet i le for byevêr.
– Men frå Møre og Romsdal og nordover i landet vil det kome snøbyer gjennom den komande helga. Det blir likevel periodar med sol, så kanskje er det gode forhold for ski, seier meteorologen.
- I store delar av landet er det no moderat fare for snøskred. Her kan du halde deg oppdatert på skredfaren.