– For human jakt er det eit lite steg tilbake. Vår erfaring er at bly er den mest effektive måten å avlive på, seier Tor Einar Ødegård Bjørk.
Han er jeger og med i styret i Luster jakt og fiskelag.
Frå 15. februar vart det forbode med blyhagl på jakt i og ved våtmark.
EU-reglane, som også gjeld EØS-landet Noreg, betyr i praksis at jegerar må bruke annan ammunisjon i så godt som alle jaktsituasjonar, ifølgje Miljødirektoratet.
– Bly er tungt, og har høg kraft når det treff viltet. Det gjer bly veldig effektivt i jakt, seier Bjørk.
Han viser til at bly dessutan er mjukt og minskar sjansen for rikosjett frå haglesvermen.
– Det finst brukbare alternativ, men dei er ikkje like gode, seier Bjørk.
Det er slike blypatroner som no er forbodne
Foto: Anders Fehn / NRK– På høg tid
Det førre forbodet mot bruk av blyhagl ved jakt i norske våtmarksområde, blei innført i 1991, men oppheva igjen i 2015.
Fram til no har jegerar kunna bruke blyhagl på kring 30 artar av fuglar og pattedyr, skriv Dagsavisen.
Det nye forbodet gjeld i og nær våtmark, uansett kva art du jaktar på.
– Sidan det er vanskeleg å vere sikker på om du er meir enn 100 meter frå våtmark til kvar tid, betyr forbodet at jegerar normalt ikkje kan bruke blyhagl på jakt i skog og fjell heller, seier Ellen Hambro, direktør i Miljødirektoratet.
Ifølgje det europeiske kjemikaliebyrået ECHA fører jakt til store mengder blyutslepp både i og utanfor våtmark i EU.
Naturvernforbundet jublar over endringa og kallar det «ein stor miljøsiger».
– Bly i bensin har vore forbode i snart 30 år. Det er på høg tid å gjere det forbode også i jaktammunisjon, seier leiar Truls Gulowsen.
Truls Gulowsen seier blyammunisjon er ein versting sett opp imot alternativa. Han håpar forbodet blir respektert.
Foto: Marte Iren Noreng TrøenHadde ønskt å fortsetje
I Norges Jeger- og Fiskeforbund er ikkje jubelen like stor.
– Vi har ønskt å fortsetje å bruke bly i skogen og på fjellet der det ikkje er miljøutfordringar ved å bruke blyhagl, seier fagrådsgjevar Vidar Nilsen.
Han reknar forbodet som nærast eit totalforbod, sidan EU-definisjonen av våtmark er så vid som den er.
Når jegerane no i praksis ikkje kan bruke bly, er alternativet andre materialar som stål, vismut eller wolfram.
– Restriksjonen gjeld i EU og EØS, og Noreg kan ikkje unndra seg det. Det må vi akseptere, og gjere så godt vi kan innanfor rammene som er gitt.
