Fjøsbrannen på Byrkjelo førre veke skal ha oppstått i ein kompaktlastar som sto inne i driftsbygninga.
– Det er i denne lastaren vi meiner at brannen starta, ut ifrå avhøyra vi har gjennomført, seier politioverbetjent ved Gloppen politistasjon, Nils Ove Roset.
Over 100 dyr mista livet då fjøsen brann ned til grunne førre fredag.
Ein kompaktlastar er ein liten diseldriven hjullastar som blir brukt av bonden til å frakte mellom anna fôr.
Rår ifrå kompaktlastarar innandørs
– Etter brannen har tre andre bønder ringd meg og sagt at kompaktlastar deira har begynt å brenne, seier leiar for Vestland bondelag, Anders Felde.
To av brannane starta utandørs, og ein innandørs.
Felde rår no ifrå å ha kompaktlastarar ståande innandørs.
– Eg er såpass utrygg på kompaktlastaren at rådet mitt er at bøndene anten må bygge ei branncelle til kompaktlastaren eller parkere han utandørs.
Ifølge han har mange bønder kompaktlastarar, og endå fleire kjem til å skaffe seg reiskapen.
– Han er veldig praktisk å bruke i samband med fôring av dyra, samanlikna med å gjere store, tunge investeringar på anna utstyr som er mykje dyrare.
Ofte vanskeleg å finne brannårsaka
Leiar i landbrukets brannvernskomité, Einar Frogner, er glad for at brannårsaka har blitt funnen.
– Det er veldig ofte vanskeleg å finne årsaka til brannen, så når vi veit det er det lettare å førebyggje at noko tilsvarande kan skje seinare.
Han er usikker på kor vanleg det er med å brann i slike type verktøy, og ønsker å undersøke saka vidare.
2 av 3 brannar husdyrbygg har starta i det elektriske anlegget, har tidlegare styreleiar i Landbrukets brannvernskomité, Pål-Arne Oulie, uttalt.
Etterforskar for å førebygge
Politiet etterforskar slike brannar då dei vil førebyggje liknande hendingar.
– Veit de om det er vanleg med brann i kompaktlastarar?
– Det er ein del av det vi kjem til å gå vidare med no i den nærmaste tida – å finne ut litt meir om kva som har skjedd og danne oss eit bilde som er litt større enn berre det som har skjedd på Breim, seier Roset.
Politiet mistenker ikkje at det har skjedd noko kriminelt i samband med brannen.