– Eg blei veldig forbausa, fortel Bjørn Grov og ler.
Den tidlegare avisredaktøren har høyrt mange gode historier gjennom åra, no er det han sjølv som kan fortelje.
I desember i fjor kom den første av to spesielle rekningar.
Ifølgje fakturaen frå Vegfinans AS hadde den eine traktoren til Grov passert bomstasjonen i Lensmannsdalen i Skien tre gonger på ein føremiddag.
– Det hadde vore ein veldig lang veg å reise med traktor for å køyre fram og tilbake i ein bomstasjon, seier Grov.
Administrerande direktør i Vegfinans AS, Nils Christian Helgesen, kjenner ikkje til akkurat denne hendinga.
– Dersom det blir oppdaga ei feilregistrering, så blir alltid fakturaen og passeringa sletta, seier Helgesen.
Skulle ha vore på ferje
Men ikkje nok med det.
I februar kom det ei ny rekning i posten. Denne gongen frå Norled sitt innkrevjingsselskap Skyttel.
Dei meinte at ein annan av Grov sine traktorar hadde vore på ferja frå Mannheller til Fodnes i Sogn.
– Dette skulle ha skjedd ein forferdeleg kald dag i februar. Hadde sikkert frose av meg alt eg hadde om eg skulle køyrd traktortur den dagen, humrar Grov.
– Pass på kva som står
Det høyrer med til historia at både Vegfinans og Norled sletta rekningane då Grov tok kontakt.
– Men ingen av dei hadde noko god forklaring på kva som hadde skjedd.
Trass i det humoristiske i historia, er Grov oppteken av at du må passe på kva som står i fakturaen du får.
– Det var jo heilt tilfeldig at eg såg at det var ein feil, slår han fast.
– Lurt å sjekke
Kommunikasjonssjef Cathrine Gjertsen i reiarlaget Norled kjenner ikkje den aktuelle saka. Det gjer heller ikkje autopassansvarleg i selskapet, då saka altså vert handtert av Skyttel. Men i ein SMS til NRK skriv Gjertsen:
– Vi er einige om at det er lurt å sjekke fakturaen då det kan skje feil, og vi er glade for at saka vart løyst.
