Med desse orda sender Sogn og Fjordane Teater og Kyrre Eikås Ottersen løvekongen Mensen Ernst (1795–1843) ut i den store vide verda.
Og karen frå Fresvik i Sogn vart etter kvart kjend i heile Europa. Etter urpremiere torsdag i Førdehuset, skal teaterstykket ut på landevegen til 31. oktober.
- LES OGSÅ:
– Vi ligg veldig godt an, og eg er veldig nøgd. No blir det første publikumsprøve i morgon og premiere torsdag. Så vi er der vi skal vere, seier regissør Otto Homlung etter pressevisninga måndag.
Måtte google
Stykket fortel historia om sjømannen og vandraren frå Vik, som vart Norges første profesjonelle idrettsutøvar. Men for ein oslogut frå Frogner, som knapt nok har jogga i Frognerparken, var ikkje Mensen Ernst den Homlung kjende best til.
Likevel var han ikkje i stuss då han fekk spørsmål frå Terje Lyngstad om å kome attende til Sogn og Fjordane Teater etter Brenning-oppsettinga.
- LES OGSÅ:
– Eg googla Ernst og fann at det var stoff som ropte etter ein scenisk versjon. Dette er ein mann som sprang frå Paris til Moskva på 14 dagar. Ein person som spring 114 kilometer i snitt per dag, må vere eit spesielt menneske, seier han.
– Fascinerande
Handlinga startar i Fresvik, men publikum blir mellom anna tekne med til England der dei 116 kilometerane frå London til Portsmouth vart Ernst sitt første lange løp.
(Artikkelen held fram under videoen)
Homlung meiner stykket er folkeleg og morosamt og skildrar det som «teikneserieaktig». Regissøren fortel om ein fascinerande sogning.
- LES OGSÅ:
– Han var absolutt dåtidas kjendis. Hadde oppvisningar kring om i heile Europa, laga løp og hadde ein omgangskrins med kongar, hertugar, prinsar og prinsesser, seier han.
I betre form
Det er Kyrre Eikås Ottersen frå Jølster som har æra å spele den absolutt største kjendisen frå Sogn og Fjordane. Som teatersjef Terje Lyngstad har gjort gjennom heile året, må skodespelaren springe i påfugldrakta.
Dog på ei tredemølle – medan han framfører replikkane.
– Det var heftig i byrjinga å skulle springe samstundes som eg snakka til eit publikum. Men no mot slutten av prøvetida trur eg vi skal få fram historia, seier han og vedgår at rolla har fått han i betre form.
Høg på seg sjølv
Eikås Ottersen tykkjer det er spennande å spele ein karrieresøkjande vikje, som var litt høg på seg sjølv.
- LES OGSÅ:
– Det er berre å la det stå til. Han dreiv PR for seg sjølv, knytte kontaktar med adelege og kom seg fram. Utgangspunktet hans var jo ganske skrint, frå fattig bakgrunn i Sogn. Det er berre for meg å køyre på, seier han og tykkjer det er kjekt at teateret set opp eit stykke om ein så spektakulær person som Ernst.
– Sprang av mange årsaker
Stykket skal setjast opp 17 gonger i Sogn og Fjordane, og ein gong i Olivinhallen på Åheim. Homlung håpar publikum tek imot sjansen til å møte ein historisk person som sprang av veldig mange årsaker.
– Han sprang for å vise foreldra sine at han verkeleg kunne. Han ville vise heimbygda si at han kunne bli til noko og sprang sikkert frå mykje angst, depresjon og tunge tankar, seier han.
– Han sprang etter sitt eige liv og hadde sett seg som mål å finne Nilens kjelde. Det klarte han ikkje, men han var veldig nær. Han døydde av dysenteri i Saharas ørken, avsluttar regissøren.