Daniella fekk livet i førjulsgåve då bilen blei treft av ein stor stein

– Eg sa til ungane mine at eg var ekstra glad for å ete frukost med dei i dag.

Orda tilhøyrer 35 år gamle Daniella Nygård frå Stad i Vestland.

For det var ikkje gjeve at tobarnsmora kom heim frå kveldsvakta kvelden før.

Daniella arbeider som helsefagarbeidar og skulle ut og stelle brukarane i Vågsvåg like utanfor Måløy.

Det snødde tett og ho køyrde ekstra varsamt.

Så smalt det.

– Lyden var grufull. Eg rakk ikkje å reagere, seier Nygård.

Ein stein på om lag 800 kilo losna frå fjellsida og trefte framme på bilen.

– Eg klarte ikkje å tenke korleis eg skulle gripe situasjonen. Eg tenkte eg måtte ringe brukarane og seie at eg blei sein, seier 35-åringen.

Hadde steinen treft bilen sekundet seinare kunne konsekvensane vore fatale.

– Eg har vore utruleg heldig og hadde englevakt. Livet er skjørt og ein blir litt meir takknemleg for kvardagen, seier Daniella Nygård dagen etter hendinga.

Sist steinfall i 2013

Det er ikkje første gong det har rasa stein ned på denne strekninga.

Sist det var registrert steinfall på vegen var i 2013.

– Det er alltid tilfeldig når det skjer steinfall og eg vil ikkje seie at denne strekninga er noko meir rasutsett enn andre vegar i fylket, seier Rune Sverre Sande, driftsleiar nord i Statens vegvesen.

Vegen som går frå Måløy sentrum ender hos den populære turistattraksjonen Kannesteinen.

– Trafikkmengda er litt høg utover der, så det er nok ein litt større risiko å treffe bilar der enn andre stadar, seier Sande.

Etter at steinen trefte bilen til Daniella vil dei vurdere om det er behov for fleire tiltak.

Mest rasfare i Vest og Nord

Vestland tronar øvst saman med Nord-Noreg i å vere staden der det er størst fare for å bli treft av ras.

Vestland fylke har åleine 32 prosent av alle registrerte skredpunkt, og over halvparten av alle skred treff vegar i Vestland.

Troms og Finnmark kjem på andreplass med 23 prosent av registrerte skredpunkt. Nordland fylke kjem på tredjeplass.

Nordland og Troms og Finnmark har dei breiaste rasa.

– Fekk ein ekstra suss

Etter skrekkhendinga i Måløy var Daniella mest oppteken av komme seg vidare.

– Eg reiste rett på arbeid igjen og fullførte siste del av oppdraga våre.

Då ho til slutt var ferdig på arbeid denne kvelden var det nokon ho hadde ekstra godt i tankane.

– Eg gjekk inn på soverommet til ungane å gav dei ein ekstra suss, og var veldig glad for det, seier Daniella Nygård.