I tillegg til fengselsstraff må kvinna betala guten 50 000 kroner i erstatning, samt 3000 kroner i sakskostnader.
«Retten finner bevist utover enhver rimelig tvil at tiltalte forsettlig forholdt seg som beskrevet i tiltalebeslutningen.», heiter det i dommen frå Bergen tingrett.
Hylte av smerter
I september 2004 passa 37-åringen guten på to år saman med fire-fem andre barn i sin eige heim. Då skal ho ha pressa han så hardt ned i barnevogna at guten brekte begge lårbeina.
Toåringen skreik av smerter og klarte ikkje å stå på beina då mora henta han, men likevel skal dagmammaen ha unnlete å tilkalla hjelp.
Mora måtte sjølv oppdaga at beina var brukne heime på stellebordet.
Låg i strekk i ein månad
På legevakta blei det konstatert brot i begge lårbeina, noko legen som vitna i saka fortalde at elles berre skjer i bilulukker.
Toåringen låg i strekk i nærmare ein månad.
No har han ein vridningsfeil i det eine benet, og det er høgdeforskjell mellom beina. Det er endå uvisst om han kjem til å få varige mén av hendinga.
- Misbrukte tilliten frå foreldra
Ifølgje ibergen.no har retten i formildande retning lagt vekt på at dagmammaen var i ein svært stressa situasjon då overgrepet skjedde.
I skjerpande retning blir det vektlagt at tiltalte var i ein posisjon som profesjonell omsorgsperson for bornet, og misbrukte tilliten som foreldra hadde gitt ho.