Birger overvaker E16 frå båt midt på fjorden

Med kikkert og blikket fast festa på fjellsida er Birger Boge og kona Margreta ansvarlege for om E16 må stengast umiddelbart. Det er lange dagar på vaktpost i Vaksdal der dei går på skift.

– Vi ligg her med båten i fjorden og ser om det losne noko oppe i fjellsida. Så her var eg klar frå før klokka 05.00, seier Boge.

Torsdag 21. mai gjekk eit stort jordras over E16 og 12. mai gjekk det eit ras på same stad. Eit passasjertog køyrde då inn i raset, men ingen vart skadd. Rasfaren i området er framleis stor, og Statens vegvesen fryktar at det skal gå eit tredje ras på staden.

• LES OGSÅ: E16 er opna for trafikk igjen

– Redd noko skal kome ned

– Torsdag då låg det så tjukk skodda at vi såg ikkje toppen. Då måtte vi stoppa arbeidet, fordi vi skal alltid ha sikt for å sjå om noko kjem ned, seier Boge.

Også laurdag morgon vart vegen stengd i nokre timar på grunn av tåke og låge skydekke. På land har trafikkdirigentane 30 sekund på seg til å stoppa trafikken om Birger varslar dei.

– Vi fokusere på den kvite flekken med snø der oppe. Det er den vi er redd for skal dette ned og ta med seg tre og andre ting på veg nedover, seier Alex Skulstad som er ein av trafikkdirigentane.

– Det er Birger ute i båten som er hovudsjefen, så han har alltid blikket opp der og ser. Om noko byrjar å røra på seg eller noko, då stengjer vi vegen med ein gong, legg Skulstad til.

– Hjelper ikkje med raudt lys

– Det enklaste er ofte det beste. Her er vi heilt avhengig av at det går fort. Då hjelper det ikkje med raudt lys, men vi må ha folk som faktisk er å følgjer med, seier Njål Farestveit som er geolog i Statens vegvesen

Rasområdet vert overvake til klokka 23.00 kvar kveld, og etter det stengjer europavegen for natta og opnar igjen 05.00.