Avviklar Førde ølutsal AS

Generalforsamlinga i Førde ølutsal AS vedtok torsdag kveld å leggje ned selskapet etter at politikarane i Førde har vedteke at butikkane skal få selje øl frå 1. juli..

- Selskapet skal leggjast ned. Det har ikkje noko hensikt å drive ølutsal når grunnlaget for å drive vert vekk, seier styreleiar i Førde ølutsal AS, Arnstein Neset.

• LES OGSÅ: I juli kjem ølet ut i butikkane
• LES OGSÅ: Gliste breitt for ølvedtaket, men..

Kan bli sal dersom nokon vil kjøpe

Han fortel at det var semje på generalforsamlinga om å gå for ei nedlegging av selskapet.

- Det kan jo vere snakk om eit sal dersom det kjem ein kjøpar som vil ha det. Men intensjonen er avvikling av selskapet, seier Neset.

Nedlegginga vil gå svært raskt, og om knapt ein månad er ølutsalet dermed historie.

- Selskapet blir avvikla frå 30. juni, seier Neset.

Per i dag er det to fast tilsette i tillegg til fem deltidstilsette i selskapet.

- Dei fekk oppseiinga i kveld, seier Neset.

Førde ølutsal AS er eigd av Førde kommune (53 %) og Førde industri og næringsskipnad (FINS) (47 %).

• LES OGSÅ: Skuffa over ølpol-avgjerda
• LES OGSÅ: No kan du få øl i butikk - ølpolet i Førde forsvinn

Butikkane må byggje om

Tidlegare i dag vedtok politikarane i Førde bystyre at butikkane kan få selje øl. Men dei må byggje om slik at dei alkoholhaldige varene ikkje står for synleg i butikkane.

Rådmannen har heile tida vore kritisk til å opne opp for ølsal i butikkane, og har rådd politikarane til å ikkje gjere eit slikt vedtak.

Rådmannen bad difor om at politikarane stilte visse krav til butikkane, dersom dei gjekk inn for ølsal i butikk.

– Butikkane må skjerme ølvarer for innsyn, så dei må gjere nokre tiltak før dei kan starte salet, seier rådmann i Førde, Ole John Østenstad til NRK.no.

I praksis er det snakk om veggar som hindrar folk i å få innsyn til dei alkoholhaldige varene.

• LES OGSÅ: Trur kulturmidlane frå øl-overskotet ikkje blir erstatta ved nedlegging