– Eg tek hanskane på for å ikkje smitte nokon og ikkje verte smitta sjølv, seier Laila Lindøy.
Ho er blant dei mange kundane i Førde som nyttar seg av eingongshanskar, sett ut av butikken, når ho skal handle.
Over heile landet deler nemleg butikkar no ut eingongshanskar til kundane sine ved inngangen av døra.
Men dette er ikkje tilrådd av verken legar eller Folkehelseinstituttet (FHI), som fryktar det kan ha ein motsett effekt av det som er ønskeleg.
– Det er ikkje anbefalt å bruke eingongshanskar for handling i butikken. Skal ein bruke det må ein uansett vaske hendene godt etterpå, seier lege Helena Niemi Eide ved FHI.
Ikkje tilstrekkeleg
Kommuneoverlege Øystein Furnes i Sunnfjord kommune fortel at utdelinga av eingongshanskar uroar. Problemet er tatt opp på leiarmøte i kommunen.
Furnes meiner det er viktig at folk og ikkje minst butikkane blir klar over kor liten effekt det har.
– Det kan føre til at folk trur dei er meir verna mot smitte enn dei eigentleg er. Dessutan har hanskane ingen effekt. Det gir ein falsk form for tryggleik, seier han.
I helsesektoren nyttar ein hanskar med eit heilt anna materiale enn plasthanskar, som nitril eller lateks. Furnes er i tvil om vanlege eingongshanskar i utgangspunktet er isolerte nok til å hindre spreiing, men påpeiker at det ikkje er der det største problemet ligg.
– Det viktigaste, dersom vernehanskar skal ha ein effekt, er faktisk korleis du tar på deg hanskane. Det er mykje meir komplisert enn folk trur, og me har ikkje ressursar til å lære folk opp i dette, seier han.
Potensiell smittekjelde
Leiar Marthe Kvittum Tangen i Norsk foreining for allmennmedisin (NFA) deler uroa.
– Det er ikkje slike type hanskar som er anbefalt om ein skal verne seg mot smitte. Ligg dei i boksar og alle skal ta på dei, vil dei uansett vere ein smittekjelde.
Ho meiner dei som skal handle først og fremst bør ta omsyn til dei nyleg oppdaterte råda som vart gitt ut av helsedirektoratet for nokre dagar sidan.
Helena Nieme Eide frå FHI legg til:
– Sjukdommen smittar primært via dropesmitte, men kan også smitte via ting ein har tatt på. Dersom ein vel å bruke hanskar, så er det difor viktig å ta dei av på rett måte.