Demonstrasjon for og mot Bybanen langs Bryggen
– Bygg den banen! ropte fleire hundre demonstrantar som i dag klokka 17.30 hadde samla seg i Bergen sentrum for å kreve at Bybanen blir bygd til Åsane via Bryggen, slik bystyret vedtok i mai.
Organisasjonen Bergens Mødre står bak demonstrasjonen. Dei gjekk i tog til rådhuset for symbolsk å spikre reguleringsplanen for Bybanen på rådhusdøra.
Fleire titals motdemonstrantar hadde mobilisert mot å bygge bybane langs Bryggen.
Politiet var til stades med ein patrulje, og anslår at opptil 400 menneske demonstrerte.
– Dette er jo ein betent konflikt, men me venta ikkje nokon dramatikk. Demonstrasjonane gjekk føre seg i sømmelege former, seier operasjonsleiar Knut Dahl-Michelsen i Vest politidistrikt til NRK.