Onsdag morgon rykte brannvesenet ut etter ein automatisk brannalarm frå Storgata 37.
Det viste seg å ikkje vera ein brann, men ein vasslekkasje i kulturhuset til kommunen i sentrum.
Bygget husar mellom anna ein kafé og eit populært fritidstilbod for unge.
Vatn gjennom bjelkelag
Brannalarmen vart utløyst av trykkfall på sprinklaranlegget, ifølgje brannmeister Thor-Arne Strand i Vestfold interkommunale brannvesen.
– Det er røyrbrot på loftet, vatnet har gått gjennom bjelkelag og tre etasjar i kulturhuset og Café Gul, opplyser han.
Brannvesenet stengde vatnet og bar unna verdigjenstandar på staden.
Det blir ei stund til det blir mogleg å framføra noko som helst på denne scena i kulturhuset.
Foto: Vestfold interkommunale brannvesen– Mykje vatn i bygget
Hans Petter Brusevold, driftsleiar i Horten kommune var på ferja då han fekk telefon om vasslekkasjen.
– Det er jo ikkje akkurat ein hyggjeleg beskjed å få kvart på sju om morgonen, seier driftsleiaren.
Hans Petter Brusevold, driftsleiar i Horten kommune.
Foto: Guro Hatlo / NRKBrusevald rykte til kulturhuset så raskt han kunne.
Då han kom til staden vart han møtt av brannvesenet og store mengder vatn.
Kor store skadar vasslekkasjen har forårsaka kan han ikkje svara på enno.
– Det er mykje vatn i bygget. Halve bygget har vel vorte vass-skadd.
Hans Petter Brusevold, driftsleiar i kommunen viser fram staden på loftet der lekkasjen har starta.
Den eine halvdelen av bygget er ubrukeleg no. Den andre halvdelen kan takast i bruk igjen relativt raskt, meiner Brusevold.
Driftsleiaren vil ikkje anslå kva det kan koste å reparere skadane.
– Pengane går jo. Det er heilt umogleg å seia, det tør eg ikkje seie noko på. Gratis blir det nok ikkje, seier Brusevold.
Café Gul er ramma av vasslekkasjen.
Foto: Vestfold interkommunale brannvesen– Hadde klump i magen
Jan-Egil Holter-Wilhelmsen vakna til melding om vasslekkasje i bygget der han driv spelrom for unge.
– Eg kjende eg hadde klump i magen. Den har losna no, seier leiaren av tilbodet Spillrommet 37.
Jan-Egil Holter-Wilhelmsen, leiar av Spillrommet 37 i kulturhuset.
Foto: Guro Hatlo / NRKHan er letta over at fritidstilbodet ikkje er ramma.
For berre nokre veker sidan stilte dei unge opp og hjelpte til med å oppdatere utstyret i spelrommet.
– Eg var kjemperedd for at alt utstyret her skulle ha vass-skadar, for her er det utstyr for ein del tusen.
No håpar han ungdommane kan koma tilbake allereie onsdag kveld.
