REC-tilsette har ein ny tung dag

Produksjonen ved REC på Herøya blir nå redusert med 60 prosent. Ein fabrikk til blir stoppa, mens ein fabrikk vil framleis produsere med 80 prosent av kapasiteten. Dette gjeld frå 1. desember og dei tre første månadene i 2012.

Om lag 200 personar blir permittert frå 1. desember, og den produksjonen som er igjen sysselsett 230 personar.

• Grunder frykter norsk industridød
• REC tilbyr sluttpakker
• 22 mill til REC i Porsgrunn

Prisane fellfaller

– Vi ser at prisane fortset å gå nedover, og derfor må vi redusere produksjonskapasiteten. For vi ser at det ikkje er mogleg å tene pengar med slike prisar på produkta, seier administrerande direktør, André Knüppel.

Prisen på solcelleprodukt stuper på verdsmarknaden, og er meir enn halvert dei siste seks månadene. For seks månader sidan var prisen over 3,5 dollar, no er prisen under 1,5 dollar på verdsmarknaden.

Knüppel viser fram ei grafisk framstilling av prisutviklinga for Waferprodukt på dataskjermen. Den viser ei bratt kurve nedover i månadsskifte i juni og juli.

Artikkelen fortset under biletet.

Tung beskjed

– Vi må prøve å overleve i denne perioden, samstundes som vi held fram med forbetringsarbeidet i produksjonen for å kome sterkare tilbake når marknaden snur igjen, seier Knüppel,

Hovudtillitsvald Hans Ødegård seier at beskjeden om permitteringar var tung å få for dei tilsette.

– Det har vore permitteringar og oppseiingar ved REC sidan juli i år, og då er det tungt å få ein ny permitteringsrunde.

Trur det snur

Men han vel å sjå positivt på at styret i REC gir bedrifta på Herøya sjansen til å halde ein fabrikk i gang til vinteren er over.

Ødegård fortel at dei har fått beskjed av styret om dei satsar på at marknaden snur og at dei tilsette klarar å gjere forbetringar i produksjonen.

– Men det er klart det er tungt å få beskjeden for dei som blir permittert, seier Ødegård.

Han seier at styret kunne ha sagt at slik som marknaden er nå, så har vi ikkje trua på dette lenger og legg ned alt saman.

– Men det sa dei ikkje. Dei sa at nå stoppar vi den eine fabrikken mellombels. Den andre kjører vi vidare, fordi vi har trua på at dette snur, og at de gjer eit godt arbeid, seier Ødegård.