Regjeringa vil prioritere å fullføre elektrifiseringa til Notodden kollektivterminal på Bratsbergbanen. Dette er ein del av 761 millionar kroner regjeringa totalt set av til tiltak som er nødvendige for å ta i bruk nytt togmateriell.
LLA (Landslaget for lokalaviser) er særs nøgd med å ha nådd fram med ønsket om å sikre avisomdeling i alle delar av landet når posten reduserer til postomdeling annankvar dag frå neste sommar. – Me satsar det me kan på digitalisering, men det er framleis papiravisa som finansierer det meste av journalistikken. Då er det sjølvsagt heilt avgjerande at papiravisa når fram til abonnentane, seier redaktør i Vest-Telemark Blad, Øystein Øygarden.
Regjeringa foreslår å løyve 8,5 millionar kroner til å opprette ein kvalitetsnorm for villrein, verdiskaping i villreinfjella og til konkrete tiltak i villreinområda. Det er klima og miljødepartementet som har foreslått ein kvalitetsnorm.
Nynorsk kultursentrum seier det er synd at regjeringa ikkje har løyvd dei nødvendige driftsmidlane til Vinje-senteret i Vinje for 2020. Vinje-senteret manglar to millionar kroner til drifta, og det vil gjere det vanskelegare å gjennomføre løftet for journalistikk og dikting som trengst, seier styreleiar Lodve Solholm.
Elevorganisasjonen i Telemark gir kommunane skulda for at det ikkje blir gitt meir pengar til skulehelsetenesta i statsbudsjettet. Leiar Odin Hovland Stahlsberg seier kommunane har brukt pengar som skulehelsetenesta skulle hatt til andre ting. Han meiner pengane må øyremerkast for å komme elevane til gode.
