Brannstasjonen har 900 uvanlege utrykkingskøyretøy

Først stod samlinga heime hos beredskapskoordinator Fred Inge Skjærum, men da den tok for mykje plass tok han like gjerne den uvanlege samlinga med seg på jobben.

Nå tel han 900 små brannbilar i hyllene.

Brannstasjonen på Herøya i Porsgrunn har derfor sin eigen mini-brannstasjon i lokala.

Ein av Noregs største samlingar

Dei små utrykkingskøyretøya er ein del av Noregs største samlingar av sitt slag.

Brannbilane er laga av både metall og plast, og dei er ei blanding av leiketøy og modellbilar. Det viktigaste er at det er brannbilar.

Skjærum er, og har alltid vore, over snittet interessert i nettopp denne typen køyretøy. Han begynte derfor å samle på dei i ung alder.

Tyske brannbilar frå 30-talet, moderne brannbilar og alt midt imellom står parkert i glashyller på brannstasjonen.

Nokre av leikebilane har han bygd sjølv.

Eit blikkfang, dekorasjon og formidling

Morten Meen Gallefoss synest samlinga er «veldig artig». Han er leiar for Grenland brann og redning og mannen som gav grønt lys for at samlinga får stå på stasjonen.

– Utstillinga er eit blikkfang som treffer alle aldersgrupper som er på besøk, skryter Gallefoss.

Brannbilsamlinga er nemleg plassert ved inngangen til stasjonen, nettopp for å vise den fram.

– Og som utsmykking, legg Gallefoss til.

Men mest av alt synest han samlinga er ein god måte å formidle historie på.

Vil utvide brannstasjonen

Sjølv om det er nok til heile fem brannbilar per tilsett på brannstasjonen, ønsker brannbilsamlar Skjærum å utvikle samlinga ytterlegare.

– Det kunne vore gøy å ha hatt tusen. Om eg når målet, får tida vise, seier Skjærum.

Han har uansett haldt av ein liten del av veggen til ei ny glashylle dersom han skulle få tak i 100 brannbilar til.