Kanskje har du køyrt forbi dette anleggsområdet med stein på 400 mål rett ved E18 sør for Kopstadkrysset i Horten.
Dagleg leiar Lars Hellik Strøm i Oslofjord Logistikk ser moglegheiter, mens vogntoga dundrar forbi.
Han vil heller at meir varer frå regionen skal fraktast med tog. I fleire år har han jobba for å bygge ein ny godsterminal her.
– Det er politisk korrekt å tenke gods på bane. Det har vore snakka om det i mange år. Og så prøver vi på noko så enkelt som å sette det ut i livet. Vi trur det er smart, fordi det er butikk. Det er marknad for det og det er framtida, seier Strøm.
Vil frakte gods med tog til Bergen
Neste år håpar han at det første toget rullar ut frå ein ny godsterminal her.
Da opnar ny dobbeltspora jernbane like ved. mellom Nykirke og Barkåker. Samtidig skal det stå klart eit jernbanespor nordfrå inn til terminalen rundt august same år, seier han.
– Da er intensjonen vår å få det godsomslaget frå veg til bane, ved at vi kan sette gods her på toget på Kopstad og køyre det for eksempel til Bergen.
Men han meiner det også er marknad for å sende varer med tog til Stavanger, Kristiansand eller Trondheim.
Behov for fleire terminalar
Sidan terminalen på Alnabru i Oslo har kapasitetsproblem, meiner han det er behov for ein ny godsterminal.
Det kan Cargonet, som er Noregs største godsoperatør på jernbane, bekrefte.
– Det er nødvendig å avlaste Alnabru, slik at gods kan bli lasta om og distribuert vidare. Det ser vi behov for, viss vi skal utvikle godstransport på bane, seier kommersiell direktør Carl Fredrik Karlsen i Cargonet.
Før bygginga av godsterminalen på Kopstad kan starte, må Oslofjord Logistikk og Statens vegvesen bli einige om rekninga for eit vegkryss på området.
Strøm trur dei finn ei løysing.
MDG fryktar auka trafikk på veg
Men Miljøpartiet Dei Grøne (MDG) i Horten er imot terminalen. Dei synest tapet av dyrka mark og skog har vore for stort.
Dessutan meiner dei at terminalen ikkje blir stor og effektiv nok, med eitt og ikkje to tilknytingsspor til Vestfoldbanen.
Dermed rettar terminalen seg meir mot tungtransport, seier kommunestyrerepresentant Lars Lønberg Henriksen i MDG.
– Viss vi skal ofre store naturverdiar på Kopstad, må det vere for at det skal vere transport til bane. Sånn det ligg an nå, blir det hovudsakleg godstransport på veg. Det ønsker ikkje vi å bidra til. Det gir auka klimautslepp og auka trafikk på vegane gjennom Horten kommune, seier han.
Einig at terminalen blir mindre effektiv
Strøm er einig i at terminalen ikkje blir like rask med berre eit tilknytingsspor.
Men han meiner terminalen kan ta imot like mange tog, fordi det er fleire spor inne på terminalen der toga kan stå. Tog som kjem sørfrå kan komme inn på godsterminalen etter at dei har snudd i Holmestrand, meiner Strøm.
Positiv for miljøet og gi fleire arbeidsplassar
Ordførar Christina Bratli (Ap) i Horten meiner godsterminalen vil gi arbeidsplassar og mindre klimautslepp.
– Den kjem til å bidra til å få meir på bane enn hjul. Det er betre at vi kan køyre ting på tog ein lastebilar.
Hei!
Har du noen tanker om det du nettopp har lest? Tips meg gjerne på e-post om andre saker du syns jeg bør lage. Ideer og innspill mottas med takk!