Skreiv dikt for å klage på klasserommet – fekk overraskande svar

I eit mintgrønt klasserom i Bø sit Henrik Romnes (15) og resten av 10B.

På veggene heng det plakatar med skuleprosjekt for å dekkje over sprekkar og hol.

Slitne og møkkete markiser heng ned framfor vindauga.

– Dei sa at vindauga skulle bytast ut, men det har ikkje skjedd. Så då tenkte eg at det hadde vore lurt å få litt fortgang på ting, seier Henrik.

Skreiv dikt etter skuletime

Sidan klassen hadde jobba med dikt i norsktimen, skreiv han like så godt eit dikt og sende til kommunen.

– Vi hadde om dikt og lyrikk i norsktimen. Dermed tenkte eg at det kunne vere interessant å skrive på denne måten.

– Elevane vart engasjerte

Norsklærar Tone Langelid er glad for initiativet frå Henrik, og rosar diktet som vart sendt til kommunen.

Ho hadde hatt undervisning i temaet dikt og lyrikk.

Langelid fortel at dei hadde jobba spesielt med femrader, som er eit kort dikt som skal formidle innhaldet på ein enkel måte.

– Elevane vart ganske engasjerte. Eg var ikkje klar over at Henrik hadde sendt diktet, så eg vart noko overraska då eg kom på jobb og fann eit svarbrev frå kommunen.

Ville gi eit originalt svar tilbake

Ordførar i Midt-Telemark, Siri Blichfeldt Dyrland, seier ho liker engasjementet frå elevane.

Brevet med diktet var rett på sak og dreidde seg om eit spørsmål som dei hadde jobba med ei stund; pengar til oppussing av Bø ungdomsskule.

Det elevane ikkje visste, var at kommunestyret allereie hadde sett av pengar til oppussing av skulen.

Heile 17 millionar faktisk.

– Vi syntest diktet var morosamt og snakka om at vi må gi eit originalt svar tilbake. Vi vart samde om at då må vi også rime.

Saman med kommunalsjefen sette ho seg ned for å skrive eit dikt tilbake til eleven.

Ros frå språkforskar

Språkforskar Arne Torp blir glad når han høyrer om diktet frå ordføraren i Midt-Telemark.

– Det var sprettent og elegant. Eg må gi honnør til ordførar for å svare på den måten, seier Torp.

Styresmaktene har jobba for at språket som blir brukt i offentlege etatar skal vere enkelt å forstå. Torp meiner det er spesielt viktig å ha eit lett språk når ein vender seg til ungdom.

– Førespurnaden var jo også spøkefull og då er det viktig å ikkje bruke kranglete byråkratspråk, seier han.

– Koseleg at ordføraren bryr seg

Henrik Romnes hadde ikkje forventa svar tilbake frå ordføraren og vart positivt overraska.

Sjølv om klasserommet ikkje blir pussa opp før han har gått ut av ungdomsskulen, er det bra at kommunen gjer noko, seier han.

– At ordføraren bryr seg, er koseleg. Det hadde vore kjekt viss dei gjorde noko med vindauga medan vi går her, men sånn er det. Det er jo bra for dei som kjem etterpå at det skjer noko.